Wararka24: Ugaaska Beesha Murusade, Cabdirisaaq Faracadde, ayaa dowladda Federaalka Soomaaliya ku eedeeyey inay mas’uul ka tahay dagaal ka dhacay magaalada Muqdisho, kaas oo dhex maray ciidamada dowladda iyo ciidamo ilaalo u ahaa Ra’iisul Wasaarihii hore ee Soomaaliya, Xasan Cali Khayre.
Ugaaska oo ku sugnaa guriga Xasan Cali Khayre xilligii uu dhacay iska horimaadka ayaa sheegay in dagaalku bilowday xilli ay socdeen dadaallo lagu dejinayay xiisadda taagneyd. Wuxuu tilmaamay in kulamo iyo waanwaan lagu waday sidii loo xallin lahaa khilaafaadka jira, balse xaaladdu ay isu beddeshay gacan ka hadal.
“Saacadu marka ay ahayd shantii galabnimo annagoo nabadda ka shaqaynayno ayay nagu bilaabatay, welina dagaalku waa nagu socdaa,” ayuu yiri Ugaas Cabdirisaaq Faracadde, isaga oo sheegay in weerarka uu ka yimid dhinaca ciidamada dowladda.
Sida uu sheegay Ugaasku, dagaalka ayaa socday saacado badan, wuxuuna sababay cabsi iyo walaac soo wajahay dadka ku nool xaafadaha ay rabshaduhu ka dhaceen. Wuxuu ku baaqay in la joojiyo colaadda, isla markaana dib loogu laabto wada-hadal iyo xal nabadeed.
Ilaa hadda ma jirto war rasmi ah oo kasoo baxay dowladda Federaalka Soomaaliya oo si toos ah uga jawaabaya eedeymaha uu jeediyay Ugaaska. Dowladda ayaa horay u sheegtay inay ka shaqeynayso sugidda amniga caasimadda iyo ilaalinta kala dambeynta.
Dhacdadan ayaa kusoo aadeysa xilli Muqdisho ay ka jiraan xiisado siyaasadeed iyo kuwo amni oo sii kordhaya, kuwaas oo la xiriira khilaafyo u dhexeeya dowladda iyo qaar ka mid ah hoggaamiyeyaasha mucaaradka.
Dhinacyada kala duwan ayaa weli is-weydaarsanaya eedeymo ku saabsan cidda mas’uulka ka ah rabshadaha dhacay, iyadoo ay socdaan dadaallo lagu doonayo in lagu qaboojiyo xaaladda amni ee magaalada.
