Wararka24: Beesha caalamka ayaa muujisay walaac xooggan oo ku aadan xaaladda amni ee ka taagan magaalada Muqdisho, iyadoo baaqyo loo diray dhinacyada ku lugta leh xiisadaha iyo dagaallada ka socda caasimadda Soomaaliya.
Safaaradda Boqortooyada Midowday ee Ingiriiska ee Soomaaliya ayaa sheegtay inay si weyn uga walaacsan tahay colaadaha laga soo sheegayo Muqdisho. Bayaan ay soo saartay ayaa lagu xusay in rabshadaha iyo dagaalladu ay halis ku yihiin amniga shacabka, iyadoo dhinacyada oo dhan loogu baaqay inay muujiyaan is-xakameyn isla markaana mudnaanta siiyaan wada-hadal iyo xal nabadeed.
Sidoo kale, dowladda Mareykanka ayaa ka hadashay xaaladda ka jirta caasimadda, iyadoo ku tilmaantay dagaallada socda kuwo halis gelin kara xasilloonida dalka. Washington ayaa sheegtay in go’aannada ay qaadaan dhinacyada siyaasadda iyo amniga ee Soomaaliya saacadaha iyo maalmaha soo socda ay saameyn weyn ku yeelan karaan mustaqbalka dalka iyo dadaallada lagu xoojinayo dowladnimada.
Dagaallada iyo xiisadaha amni ayaa saameyn ku yeeshay isu socodka iyo nolashii caadiga ahayd ee Muqdisho. Wararka laga helayo magaalada ayaa sheegaya in isku socodka dadka iyo gaadiidka uu yaraaday, halka qaar kamid ah goobaha ganacsiga ay xireen albaabbadooda sababo la xiriira cabsi amni.
Sidoo kale waxaa jira warar sheegaya in qoysas badan ay ka guureen xaafado ka tirsan magaalada si ay uga fogaadaan goobaha ay ka dhacayaan iska horimaadyada. Dadka barakacay ayaa wajahaya xaalado adag, iyagoo raadinaya meelo ammaan ah oo ay ku sugnaadaan.
Hay’adaha caalamiga ah iyo dalalka daneeya arrimaha Soomaaliya ayaa ku baaqay in si degdeg ah loo joojiyo colaadaha, lana xoojiyo dadaallada diblomaasiyadeed iyo wada-hadallada siyaasadeed. Waxay sidoo kale ka digeen in sii socoshada dagaalladu ay horseedi karto xaalad bani’aadamnimo iyo mid amni oo sii xumaata.
Indhaha bulshada gudaha iyo kuwa caalamkaba ayaa hadda ku wajahan Muqdisho, iyadoo la sugayo tallaabooyinka ay qaadi doonaan dhinacyada isku haya khilaafka si loo soo celiyo deganaanshaha iyo amniga magaalada.
