Wararka24: Imaam Cumar Macalin Abshir oo kamid ah waxgaradka Soomaaliyeed ayaa ka jawaabay hadal uu dhawaan jeediyay Garaad Jaamac Garaad Cali oo la xiriiray dadaallada lagu dhex-dhexaadinayay Dowladda Federaalka Soomaaliya iyo mucaaradka.
Garaad Jaamac Garaad Cali ayaa sheegay in dadaalladaas ay hakad galeen kadib markii aan la soo dhammaystirin xubnihii laga sugayay guddiga odayaasha dhaqanka ee loo xil saaray dhexdhexaadinta, gaar ahaan xubnaha laga filayay beelaha Hawiye.
Isagoo ka hadlayay arrintaasi, Imaam Cumar Macalin Abshir ayaa sheegay in odayaasha Hawiye ay taageersan yihiin nabadda, dowladnimada iyo xasilloonida dalka, isla markaana aysan qayb ka noqon doonin tallaabo kasta oo horseedi karta xiisad ama colaad.
“Waxaan maqlaayay nin oday ah oo maalin dhaweyd dhahaayo odayaashii Hawiye ayaa soo bixi waayay. Odayaasha Hawiye nabad ayay rabaan, dowladnimo ayay rabaan, karaamo ayay rabaan,” ayuu yiri Imaam Cumar.
Waxa uu sidoo kale sheegay in dhaqanka Soomaaliyeed aanu waafaqsanayn in isimmo ama odayaal dhaqameed ay hormuud ka noqdaan dagaal ama isku dhac siyaasadeed, isaga oo ku baaqay in khilaafaadka lagu xalliyo wada-hadal iyo is-afgarad.
Dooddan ayaa kusoo aadaysa xilli ay weli socdaan dadaallo lagu raadinayo xal siyaasadeed oo ku saabsan murannada ka dhashay arrimaha doorashooyinka iyo khilaafaadka u dhexeeya dowladda federaalka iyo qaar kamid ah mucaaradka.
Si kastaba, dhinacyada siyaasadda Soomaaliya ayaa wajahaya marxalad xasaasi ah, iyadoo baaqyada ku aaddan wada-hadalka iyo xalinta khilaafaadka ay sii kordhayaan maalmahan dambe.
Daawo
