Wararka24: Dowladda Turkiga ayaa la sheegay inay qorsheynayso inay wafdi heer sare ah u dirto magaalada Muqdisho kadib fasaxa Ciidul Adxaa, iyadoo lagu wado inay door ka qaadato dadaallada lagu xallinayo khilaafka siyaasadeed ee ka taagan Soomaaliya.
Ilo diblumaasiyadeed ayaa sheegay in Ankara ay doonayso inay qaadato door dhexdhexaadin ah, si loo helo xal siyaasadeed oo ay isku raacsan yihiin dowladda federaalka iyo dhinacyada mucaaradka. Dadaalladan ayaa kusoo aadaya xilli ay sii kordhayaan murannada la xiriira hannaanka doorashooyinka iyo isbeddellada siyaasadeed ee dalka.
Wararka la helayo ayaa tilmaamaya in toddobaadyadii lasoo dhaafay ay jireen kulamo dhexmaray mas’uuliyiin ka tirsan wasaaradda arrimaha dibadda iyo hay’adaha amniga Turkiga iyo xubno ka tirsan mucaaradka Soomaaliya. Sida ay sheegayaan xogahaasi, Turkiga ayaa dhinacyada u sheegay inuusan la safnayn hal dhibac oo keliya, balse uu doonayo heshiis lagu wada qanco.
Dhanka kale, Madaxweyne Xasan Sheekh Maxamuud ayaa dhawaan kulamo la yeeshay safiirka Turkiga ee Soomaaliya, Alper Aktaş. Kulamadaas ayaa lagu sheegay inay diiradda saarayeen iskaashiga labada dal ee dhinacyada amniga, dhaqaalaha iyo arrimaha siyaasadda.
Qaar kamid ah siyaasiyiinta mucaaradka ayaa hore u muujiyay walaac ku saabsan doorka Turkiga ee arrimaha gudaha Soomaaliya, iyagoo mararka qaar ku eedeeyay Ankara inay saameyn ku leedahay khilaafaadka siyaasadeed ee dalka. Eedeymahaas ayay dowladda Turkiga si rasmi ah uga hadlin.
Falanqeeyayaal siyaasadeed ayaa aaminsan in dadaallada cusub ee Turkiga ay ka tarjumayaan walaaca laga qabo sii xoogeysiga kala qeybsanaanta siyaasadeed, taas oo saameyn ku yeelan karta xasilloonida iyo geeddi-socodka dowladnimada Soomaaliya.
Turkiga ayaa weli ka mid ah saaxiibbada ugu waaweyn ee Soomaaliya, isagoo taageero ka geysta amniga, tababarka ciidamada, horumarinta kaabayaasha dhaqaalaha iyo adeegyada caafimaadka, kuwaas oo qayb muhiim ah kaqata xiriirka labada dal.
