Wararka24: Wararka ka imanaya gobolka Shabeellaha Hoose ayaa sheegaya in xalay duqeyn dhanka cirka ah laga fuliyay deegaanka Ugunji. Weerarka ayaa la sheegay in lagu bartilmaameedsaday xubno ka tirsan Al-Shabaab oo ku sugnaa halkaasi.
Wasaaradda Gaashaandhigga Soomaaliya ayaa war-saxaafadeed ay soo saartay ku sheegtay in howlgalka ay iska kaashadeen Ciidanka Xoogga Dalka iyo saaxiibada caalamiga ah. Sida lagu sheegay warka, bartilmaameedka duqeyntu wuxuu ahaa maleeshiyaad lagu eedeeyay inay qorsheynayeen falal amni darro.
Wasaaraddu waxay sheegtay in howlgalka uu u dhacay sidii loo qorsheeyay. Dowladda ayaa intaasi ku dartay in lix xubnood lagu dilay weerarka, isla markaana lagu burburiyay hub iyo agab militari oo ay kooxdaasi adeegsaneysay.
Qoraalka kasoo baxay Wasaaradda Gaashaandhigga ayaa sidoo kale lagu sheegay in ciidamada ay sii wadi doonaan howlgallada ka dhanka ah Al-Shabaab. Dowladda ayaa ku adkeysatay in la kordhin doono dadaallada lagu beegsanayo xubnaha wali ku sugan deegaannada ay ka howlgalaan.
Dadka deegaanka qaarkood ayaa sheegay in jugta duqeynta si weyn looga maqlay aagga Ugunji iyo nawaaxigiisa. Wararka la helayo waxay tilmaamayaan in dhaqdhaqaaqyo amni iyo kuwa militari ay weli ka socdaan deegaanka, inkastoo aan la helin warar madax-bannaan oo xaqiijinaya khasaaraha guud ee weerarka.
Gobolka Shabeellaha Hoose ayaa ka mid ah meelaha ay muddooyinkii dambe ka socdeen howlgallo ciidan oo lagu beegsanayo Al-Shabaab. Dowladda Federaalka Soomaaliya iyo saaxiibadeeda caalamiga ah ayaa sare u qaaday weerarrada cirka iyo howlgalada dhulka, kuwaas oo lagu bartilmaameedsanayo xarumo, saldhigyo iyo dhaq-dhaqaaqyada kooxda.
Xaaladda deegaanka Ugunji ayaa weli si dhow loola socdaa, iyadoo la filayo in maalmaha soo socda ay soo baxaan faahfaahin dheeraad ah oo ku saabsan natiijada howlgalka iyo xaaladda amni ee halkaasi.
