Wararka24: Dowladda Masar ayaa si adag uga hortimid qorshaha Somaliland ee ah inay safaarad ka furato magaalada Qudus, iyadoo arrintaasi ku tilmaamtay mid sharci darro ah oo ka hor imaanaysa qawaaniinta caalamiga ah iyo go’aannada Qaramada Midoobay.
Bayaan kasoo baxay Wasaaradda Arrimaha Dibadda Masar ayaa lagu sheegay in Qaahira ay si cad u diidan tahay tallaabo kasta oo lagu taageerayo ama lagu sharciyeynayo xaaladda muranka badan ee magaalada Qudus.
Masar ayaa carrabka ku adkeysay in Bariga Qudus uu yahay dhul Falastiini ah oo la haysto tan iyo sanadkii 1967, islamarkaana aan la aqbali karin wax tallaabo ah oo wax ka beddeleysa xaaladda siyaasadeed iyo sharci ee magaaladaasi.
War-saxaafadeedka ayaa sidoo kale lagu sheegay in Masar ay taageersan tahay midnimada, madaxbannaanida iyo wadajirka dhuleed ee Jamhuuriyadda Federaalka Soomaaliya. Dowladda Masar ayaa ka digtay tallaabo kasta oo hal dhinac ah oo saameyn ku yeelan karta qarannimada Soomaaliya.
Digniintan ayaa kusoo aadeysa xilli ay sii kordhayaan wararka sheegaya in Somaliland ay qorsheyneyso xiriir diblomaasiyadeed oo dhow oo ay la yeelato Israel, kadib markii Israa’iil ay noqotay dalkii ugu horreeyay ee si rasmi ah u aqoonsada Somaliland.
Jaamacadda Carabta iyo Ururka Iskaashiga Islaamka ee OIC ayaa sidoo kale horey u cambaareeyay qorshaha Somaliland ee safaaradda Qudus, iyagoo sheegay inuu ka hor imaanayo mowqifka mideysan ee dunida Islaamka ee ku saabsan magaalada barakeysan ee Qudus iyo qadiyadda Falastiin.
Dhanka kale, Israa’iil ayaa qorsheyneysa inay safaarad ka furato magaalada Hargeysa, sida uu shaaciyay safiirka cusub ee Somaliland u qaabilsan Israa’iil, Maxamed Xaaji. Arrintan ayaa sii xoojisay doodda iyo falcelinta siyaasadeed ee ka dhalatay xiriirka cusub ee u dhexeeya Somaliland iyo Israel.
Go’aanka la xiriira Qudus ayaa haatan Somaliland geliyay muran siyaasadeed iyo diblomaasiyadeed oo ballaaran, iyadoo dalal badan oo Carbeed iyo Islaami ah ay muujinayaan walaac xooggan oo ku saabsan tallaabadaasi.
