Wararka24: Mas’uuliyiin ka tirsan maamulka Madaxweyne Donald Trump ayaa lagu warramayaa inay dowladda Isutagga Imaaraadka Carabta ku dhiirrigelinayaan inay si weyn ugu lug yeelato dagaalka Iiraan, isla markaana ay la wareegto jasiiradda istaraatiijiga ah ee Lavan oo ku taalla Gacanka, sida uu qoray wargeyska The Telegraph.
Warbixinta ayaa sheegtay in qaar kamid ah shaqsiyaadka aadka ugu dhow Donald Trump ay soo jeediyeen in ciidamada Imaaraadka ay si toos ah u qabsadaan jasiiraddaasi, halkii ciidamada Mareykanka ay howlgalkaasi fulin lahaayeen.
Sarkaal sare oo hore uga tirsanaa dhinaca amniga ee maamulka Trump ayaa wargeyska u sheegay in Imaaraadka lagu dhiirrigeliyay inuu tallaabadaasi qaado, isagoo sheegay in ciidamada Imaaraadka ay si toos ah dhulka uga hawlgeli karaan.
Arrintan ayaa kusoo aadeysa xilli uu sii xoogeysanayo dagaalka u dhexeeya Iiraan iyo isbaheysiga Mareykanka iyo Israa’iil, iyadoo Imaaraadka lagu eedeeyay inuu qaaday duqeymo qarsoodi ah oo lagu beegsaday goobo ay Iiraan ku leedahay Jasiiradda Lavan horraantii bishii Abriil.
Warbixinnada ayaa sidoo kale muujinaya in xiriirka Imaaraadka iyo Israa’iil uu sii xoogeysanayo tan iyo markii uu dagaalku billowday. Israa’iil ayaa la sheegay inay Abu Dhabi siisay nidaamka difaaca cirka ee Iron Dome si looga hortago weerarrada Iiraan.
Dhinaca kale, falanqeeyayaal badan ayaa aaminsan in dagaalkan uu beddel weyn ku keenayo isku dheelitirka awoodda Bariga Dhexe, iyadoo dalalka gobolka ay u kala safanayaan isbaheysiyo cusub oo iska soo horjeeda.
Sidoo kale, warbixintu waxay sheegtay in Imaaraadka uu wajahayo cadaadis amni iyo mid dhaqaale kadib weerarro gantaallo iyo diyaarado drones ah oo ay Iiraan ku qaaday, kuwaas oo lagu tilmaamay kuwo si weyn u saameeyay xaaladda amni ee dalkaasi.
Dhanka kale, Sacuudi Carabiya iyo Qatar ayaa la sheegay inay diideen dalab uga yimid Imaaraadka oo ahaa inay ku biiraan weerarro aargoosi ah oo ka dhan ah Iiraan, taas oo sii muujisay kala aragti duwanaanta ka dhex jirta dalalka Khaliijka.
Iiraan ayaa toddobaadkan ku eedeysay Imaaraadka inuu si firfircoon uga qeyb qaadanayo colaadda, halka Abu Dhabi ay si adag u beenisay eedeymahaasi, iyadoo sheegtay inay xaq u leedahay inay difaacato amnigeeda iyo madax-bannaanideeda.
