Wararka24: Madaxweynaha Somaliland, Cabdiraxmaan Maxamed Cabdullaahi Cirro, ayaa saaka dib ugu laabtay magaalada Hargeysa kadib safar in ka badan 20 maalmood uu ku joogay dalka Imaaraadka Carabta.
Madaxweynaha ayaa si weyn loogu soo dhaweeyay garoonka diyaaradaha ee Hargeysa, waxaana halkaasi kusoo dhaweeyay xubno ka tirsan goleyaasha dowladda iyo saraakiisha amniga. Kadib waxaa loo galbiyay xarunta madaxtooyada halkaas oo uu kula kulmay madaxweyne ku xigeenka iyo qaar kamid ah golihiisa wasiirrada.
Qoraal kooban oo kasoo baxay madaxtooyada Somaliland ayaa lagu sheegay in safarka Cirro uu ahaa mid shaqsi ah, isla markaana uu haatan dib ugu soo laabtay dalka si uu usii wato howlihiisa shaqo.
“Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro) ayaa dalka dib ugu soo laabtay kadib safar shaqsi ah oo uu ugu maqnaa dalka Imaaraadka Carabta,” ayaa lagu yiri qoraalka madaxtooyada.
Safarka dheer ee madaxweynaha ayaa maalmihii lasoo dhaafay dhaliyay hadal-heyn xooggan, iyadoo dad badan ay isweydiinayeen sababta maqnaanshihiisa tan iyo 23-kii April markii la sheegay inuu u baxay arrimo gaar ah.
Qaar kamid ah shacabka ayaa baraha bulshada ku muujiyay dareenkooda ku aaddan dib usoo laabashada madaxweynaha. Dadka qaar ayaa u rajeeyay caafimaad iyo soo kabasho wanaagsan, halka kuwo kale ay kusoo dhaweeyeen inuu dib ugu soo laabto dalka.
Sidoo kale, baraha bulshada ayaa lagu faafiyay hadallo iyo mala-awaallo kala duwan oo la xiriiray safarka madaxweynaha, inkastoo aysan jirin war rasmi ah oo xaqiijinaya sheegashooyinkaasi.
