Wararka24: Guddoomiyaha Maamulka Gobolka Banaadir ahna Duqa Magaalada Muqdisho Xasan Maxamed Xuseen (Muungaab) ayaa shir guddoomiyay loogana hadlay xaaladda amniga caasimadda iyo xoojinta wada-shaqeynta hay’adaha ammaanka.
Kulanka ayaa diiradda lagu saaray dardargelinta qorshayaasha lagu sugayo amniga magaalada Muqdisho, iyadoo la xoojinayo iskaashiga u dhexeeya laamaha amniga iyo maamullada degmooyinka si loo xaqiijiyo xasilloonida caasimadda.
Shirka ayaa sidoo kale lagu adkeeyay fulinta amarkii hore ee maamulka gobolka ee lagu hakiyay dhammaan howlaha la xiriira fulinta dhulka, baneynta iyo jid-u-furista ka socotay gudaha magaalada Muqdisho.
Mas’uuliyiinta maamulka ayaa sheegay in tallaabadan ay qeyb ka tahay dadaallada lagu ilaalinayo kala dambeynta iyo amniga guud ee magaalada, xilli ay jiraan cabashooyin la xiriira muranka dhulka danta guud.
Guddoomiye Xasan Maxamed Xuseen Muungaab ayaa sheegay in amniga Muqdisho uu yahay laf-dhabarta horumarka caasimadda iyo guud ahaan dalka, isagoo faray hay’adaha ammaanka inay labanlaabaan dadaallada lagu xaqiijinayo nabadda iyo badqabka shacabka.
Dhanka kale, Taliyaha Qeybta Booliska Gobolka Banaadir Macalin Mahdi ayaa ka digay kooxo uu ku eedeeyay inay wadaan falal amni-darro iyo isku dayo lagu qalqal gelinayo xasilloonida caasimadda.
Wuxuu shacabka ugu baaqay feejignaan iyo inay laamaha amniga la wadaagaan xog kasta oo la xiriirta burburin cusub ama dhaqdhaqaaqyo khatar ku noqon kara amniga Muqdisho.
Kulankan amni ayaa kusoo aadaya xilli siyaasiyiinta mucaaradka ay qorsheynayaan dibadbaxyo ka dhan ah dowladda, kuwaas oo la filayo inay ka dhacaan Muqdisho 10-ka May, iyadoo arrimaha dhulka iyo xarigyada dhalinyarada ay qeyb ka yihiin cabashooyinka ay mucaaradku soo bandhigeen.
