Wararka24: Dowladda Pakistan ayaa shaacisay inay wafdi heer sare ah u soo dirayso magaalada Muqdisho si ay wada-hadallo ula yeeshaan Dowladda Federaalka Soomaaliya, kuwaas oo la xiriira sii deynta shaqaale Pakistani ah oo lagu haysto afduub.
Shaqaalahan ayaa la sheegay inay saarnaayeen markab ganacsi oo ay la wareegeen kooxo burcad-badeed Soomaali ah xilli uu marayay biyaha Gacanka Cadmeed. Ilo diblomaasiyadeed ayaa sheegay in arrintan ay abuurtay walaac xooggan oo ka dhex jira dowladda Pakistan iyo qoysaska dadka la haysto.
Afhayeenka Wasaaradda Arrimaha Dibadda Pakistan, Tahir Hussain Andrabi, ayaa xaqiijiyay in Islamabad ay xiriir joogto ah la leedahay mas’uuliyiinta Soomaaliya si xal looga gaaro xaaladda shaqaalahaasi. Wuxuu sheegay in dadaallo diblomaasiyadeed ay socdaan si loo dedejiyo sii deyntooda.
Andrabi ayaa sidoo kale xusay in safaaradda Pakistan ee Soomaaliya iyo wasaaradda arrimaha dibadda dalkiisa ay si dhow ula socdaan horumarka kiiskan. Wuxuu tilmaamay in wafdiga la filayo inuu dhowaan gaaro Muqdisho si uu ula kulmo hay’adaha ay khuseyso arrintan.
Wararka ayaa sheegaya in markabka lagu magacaabo Honor 25 ay saaran yihiin 17 shaqaale, kuwaas oo 10 ka mid ah ay yihiin muwaadiniin Pakistani ah. Shaqaalahan ayaa la haystaa tan iyo 21-kii bishii April, iyadoo xaaladdooda weli aan si buuxda loo ogeyn.
Dhanka kale, kooxaha burcad-badeedda ee markabka heysta ayaa la sheegay inay dalbadeen wadahadal toos ah oo ay la yeeshaan wakiillo ka socda dowladda Pakistan, arrintaas oo muujineysa in xal wadahadal lagu raadinayo.
Qoysaska shaqaalaha la haysto ayaa weli ku jira xaalad walwal iyo sugitaan adag, iyagoo rajeynaya in dadaallada diblomaasiyadeed ee socda ay horseedi doonaan sii deyn degdeg ah iyo badbaado.
