Guddiga Madaxa-bannaan ee Doorashooyinka Qaranka ayaa qaaday tallaabo cusub oo la xiriirta hirgelinta doorashooyinka qof iyo cod ee maamulka Koonfur Galbeed of Somaaliya, kadib markii qalabka doorashada loo diray deegaannada maamulkaasi.
Guddoomiyaha guddiga doorashooyinka Cabdikariin Axmed Xasan ayaa shaaciyay in 10-ka bishan ay si rasmi ah uga bilaaban doonaan deegaannada Koonfur Galbeed doorashooyinka goleyaasha degmooyinka, kuwaas oo noqonaya tallaabadii ugu horreysay ee hirgelinta nidaamka qof iyo cod.
Sida uu sheegay guddoomiyuhu, doorashooyinkan ayaa ka dhici doona 13 degmo oo ka kala tirsan gobollada Baay, Bakool iyo Shabeellaha Hoose, iyadoo shacabka deegaanka loo qorsheeyay inay si toos ah u doortaan goleyaashooda deegaanka.
Cabdikariin ayaa xusay in guddigu dhammeystiray diyaarinta goobaha codbixinta iyo tababarka shaqaalaha fulinaya howlaha doorashada, si loo xaqiijiyo in doorashadu u dhacdo si habsami leh.
Waxa uu sidoo kale tilmaamay in in ka badan 400,000 oo qof ay iska diiwaangeliyeen deegaannada Koonfur Galbeed, kuwaas oo diyaar u ah inay ka qeyb qaataan codbixinta soo socota.
Doorashadan ayaa kusoo aadeysa xilli siyaasadda Koonfur Galbeed ay gashay marxalad xasaasi ah, iyadoo uu jiro loollan siyaasadeed oo ku saabsan doorashada madaxtinimada maamulkaasi.
Wararka siyaasadda ayaa sheegaya in JSP uu tartanka ku matalayo Guddoomiyaha Golaha Shacabka Sheekh Aadan Madoobe, taas oo sii xoojisay xiisadda siyaasadeed ee ka taagan maamulka.
DAAWO
