Wararka24: Loolanka istaraatiijiyadeed ee u dhexeeya Turkey iyo Israel ayaa si weyn uga muuqda gudaha Soomaaliya iyo guud ahaan Geeska Afrika, xilli labada dal ay xoojinayaan saameyntooda siyaasadeed, amni iyo mid dhaqaale ee gobolka.
Dowladda Turkiga ayaa sii ballaarisay xiriirka ay la leedahay Soomaaliya, iyadoo heshiisyo cusub ka saxiixatay dhinacyada tamarta iyo iskaashiga milateri. Ankara ayaa sidoo kale sii wada taageerada tababarka ciidamada Soomaaliya iyo mashaariicda kaabeyaasha dhaqaalaha, taas oo sare u qaadday doorkeeda gudaha dalka.
Wararka la helayo ayaa tilmaamaya in Turkiga uu diyaarinayo inuu bilaabo wajiga cusub ee baarista shidaalka xeebaha Soomaaliya, kadib sahanno hore oo la sameeyay sanadkii lasoo dhaafay. Dowladda Soomaaliya ayaa arrintan u aragta fursad dhaqaale oo muhiim u ah horumarka dalka.
Dhanka kale, Israa’iil ayaa la sheegay inay xoojisay xiriirka ay la leedahay maamulka Somaliland, arrintaas oo dhalisay dood siyaasadeed iyo walaac ka yimid dowladda federaalka Soomaaliya. Muqdisho ayaa markale ku celisay mowqifkeeda ku aaddan midnimada dhuleed ee dalka.
Warbixino caalami ah ayaa sidoo kale sheegaya in Israa’iil ay xiiseynayso saldhigyo amni oo ku dhow marin-biyoodka Bab el-Mandeb, si ay ula socdaan xaaladaha amni ee gobolka, gaar ahaan dhaq-dhaqaaqyada ka imanaya Yemen.
Falanqeeyayaal siyaasadeed ayaa sheegaya in tartankan cusub uu ka tarjumayo isbeddelka awood-qaybsiga gobolka, iyadoo Soomaaliya ay noqotay goob muhiim ah oo ay quwadaha gobolka iyo kuwa caalamku ku loollamayaan saameyn siyaasadeed iyo mid amni.
