Wararka24: Madaxweynihii hore ee maamulka Koonfur Galbeed, Cabdicasiis Xasan Maxamed Laftagareen, ayaa lagu soo warramayaa inuu qorsheynayo dib ugu laabashada siyaasadda maamulkaasi, xilli isaga iyo xulafadiisa ay dhaq-dhaqaaqyo ka wadaan magaalada Nairobi.
Afhayeenkiisa, Ugaas Xasan Cabdi Maxamed, ayaa sheegay in ay socdaan dadaallo lagu doonayo in dib loogu soo celiyo hoggaankii hore ee Koonfur Galbeed, isaga oo ku tilmaamay mid ku yimid hannaan sharci iyo dastuur waafaqsan.
Wuxuu xusay in qorshahaasi uu yahay mid lagu doonayo in dib loo soo nooleeyo nidaamkii dowladnimo ee maamulka, islamarkaana la xaqiijiyo in rabitaanka shacabka uu noqdo saldhigga maamulka.
Afhayeenka ayaa shacabka Koonfur Galbeed ugu baaqay inay taageeraan dadaallada lagu soo celinayo maamulkii hore, isaga oo tilmaamay in arrintani muhiim u tahay ilaalinta xuquuqda dastuuriga ah iyo madax-bannaanida maamulka.
Qoraal uu soo saaray afhayeenka Laftagareen ayaa sidoo kale lagu xusay in 28-ka Abriil ay tahay maalin xusuus gaar ah u leh shacabka Koonfur Galbeed, maadaama ay ku beegan tahay sanad-guuradii dib-u-doorashadii Laftagareen.
Dhanka kale, xulafada Laftagareen ayaa dowladda federaalka ku eedeeyay inay faragelin ku sameysay maamulka Koonfur Galbeed, taas oo ay sheegeen inay wiiqday hay’adihii dastuuriga ahaa iyo nidaamka federaalka.
Dhaqdhaqaaqyadan cusub ayaa kusoo aadaya xilli xaaladda siyaasadeed ee Koonfur Galbeed ay tahay mid xasaasi ah, iyadoo magaalada Baidoa ay martigelineyso tartan siyaasadeed iyo loollan ku saabsan hoggaanka maamulka.
