Wararka24: Cabdullaahi Maxamed Nuur ayaa si rasmi ah ugu dhawaaqay inuu iska casilay xilkii la-taliyaha Madaxweynaha Jamhuuriyadda Federaalka Soomaaliya, kadib khilaaf siyaasadeed oo soo kala dhex-galay isaga iyo Xasan Sheekh Maxamuud.
Qoraal uu ku baahiyay baraha bulshada ayuu ku sheegay in go’aanka iscasilaaddiisa uu qaatay kadib markii ay isku fahmi waayeen jihada siyaasadeed ee dalka iyo sida loo wajahayo marxaladda kala guurka ah ee hadda taagan.
Cabdullaahi Maxamed Nuur ayaa xusay in khilaafkaasi uu salka ku hayo arrimo siyaasadeed oo xasaasi ah, kuwaas oo uu aaminsan yahay inay keeni karaan xasillooni darro siyaasadeed iyo mid amni haddii aan xal degdeg ah laga gaarin.
Wuxuu sidoo kale tilmaamay in muddo xileedka hay’adaha dowladda Federaalka uu ku egyahay bartamaha bisha May 2026, isagoo carrabka ku adkeeyay baahida loo qabo in la helo xal mideyn kara dhinacyada kala duwan ee siyaasadda si looga hortago qalalaase hor leh.
Iscasilaaddan ayaa kusoo aadeysa xilli ay sii xoogeysanayaan xiisadaha siyaasadeed ee dalka, gaar ahaan kuwa la xiriira doorashooyinka iyo mustaqbalka dowladnimada Soomaaliya.
Sidoo kale, waxaa xusid mudan in horey ay xilalka uga tageen ama uga fogaadeen siyaasadda dhowr shaqsi oo si dhow ula shaqeynayay madaxweynaha, kuwaas oo ay ka mid yihiin Cabdiraxmaan Odawaa iyo Cabdullaahi Maxamed Cali Sanbaloolshe.
Dhaq-dhaqaaqyadan ayaa muujinaya isbeddelka iyo kala aragti duwanaanta sii kordheysa ee ka dhex jirta saaxadda siyaasadeed ee dalka.
