Wararka24: Wasiirka Gaashaandhigga ee Dowladda Federaalka Soomaaliya Axmed Macallin Fiqi ayaa war-saxaafadeed kasoo saaray mudaharaadyada iyo dhaq-dhaqaaqyada siyaasadeed ee ay wadaan xubno ka tirsan mucaaradka gudaha Muqdisho.
Wasiirka ayaa si adag u dhaliilay habka ay mucaaradku u wajahayaan xaaladda siyaasadeed ee dalka, isaga oo sheegay in dhaq-dhaqaaqyadooda ay muujinayaan hoos-u-dhac siyaasadeed iyo fashil ku yimid qorshahooda siyaasadeed.
Axmed Macallin Fiqi ayaa sheegay in qaar kamid ah siyaasiyiinta mucaaradka ay u weydeen taageero dadweyne, taasina ay sababtay inay bilaabaan mudaharaadyo iyo ololeyaal uu ku tilmaamay kuwo aan saameyn weyn lahayn. Waxa uu sidoo kale ku eedeeyay inay isku dayayaan qalqal-gelinta amniga iyo marin-habaabinta shacabka Soomaaliyeed.
Wasiirka ayaa xusay in dowladda aysan oggolaan doonin isku day kasta oo lagu wiiqayo amniga iyo dowladnimada, isaga oo carrabka ku adkeeyay in la fashilin doono tallaabo kasta oo halis gelin karta xasilloonida dalka.
Dhanka kale, wuxuu shacabka Soomaaliyeed uga mahadceliyay sida ay uga feejigan yihiin dhaq-dhaqaaqyada siyaasadeed ee uu sheegay inay hore ugu hungoobeen mas’uuliyado dowladeed.
Hadalkan ayaa kusoo aadaya kadib markii toddobaadkii hore siyaasiyiin mucaarad ah iyo taageerayaal dhalinyaro ah ay mudaharaad ka dhan ah dowladda ku qabteen xarunta Himilo Qaran ee Muqdisho, iyagoo dalbanayay in la sii daayo xubno ka tirsan dhalinyarada xisbiga oo dowladda u xiran.
