Wararka24: Madaxweynaha maamulka Somaliland, Cabdiraxmaan Maxamed Cabdullaahi Cirro, ayaa si kulul uga hadlay isku daygii weerar ee lala beegsaday Madaxweynaha Mareykanka Donald Trump, isagoo sheegay inuu ka naxay dhacdadaasi isla markaana uu cambaareynayo.
Cirro ayaa qoraal uu soo saaray ku muujiyay taageerada ay xukuumaddiisu u hayso dowladda Mareykanka iyo shacabka Mareykanka, isaga oo sheegay in weerarrada noocan ah ay khatar ku yihiin xasilloonida iyo amniga siyaasadeed.
“Aad ayaan uga naxay ugana xumahay isku daygii weerar ee lagu qaaday madaxweyne Trump. Waxaan garab taaganahay Mareykanka,” ayuu yiri Madaxweyne Cirro.
Dhacdadan ayaa timid kadib markii nin hubeysan uu isku dayay inuu jebiyo amniga goobta lagu qabanayay casho-sharafeedka wariyeyaasha Aqalka Cad ee ka socday Hotelka Washington Hilton, halkaas oo Trump iyo saraakiil sare oo Mareykan ah ay ku sugnaayeen. Sida wararku sheegayaan, ciidamada United States Secret Service ayaa si degdeg ah uga falceliyay, iyagoo ka saaray goobta madaxweynaha iyo martidii kale.
Mas’uuliyiinta Mareykanka ayaa xaqiijiyay in Trump uu badqabo, halka hal askari oo ka tirsan ilaalada gaarka ah uu dhaawac fudud kasoo gaaray dhacdada kadib markii xabbad ku dhacday jaakaddiisa xabadda celisa.
Booliska ayaa gacanta ku dhigay eedeysanaha oo lagu magacaabay Cole Tomas Allen, waxaana socda baaritaanno lagu ogaanayo sababta rasmiga ah ee ka dambeysay weerarkaasi.
Falcelinta Somaliland ayaa kusoo aadeysa xilli ay sii xoogeysanayaan xiriirka diblomaasiyadeed ee u dhexeeya Somaliland iyo Mareykanka, iyadoo arrintan loo arko fariin muujinaysa garab istaag siyaasadeed oo ku wajahan Washington.
