Wararka24:Guddoomiyaha Aqalka Sare ee Baarlamaanka Soomaaliya, Cabdi Xaashi Cabdullaahi, ayaa si adag u dhaliilay hay’adaha dowladda, isagoo ku eedeeyay inay ku guuldaraysteen fulinta iyo ilaalinta shuruucda dalka, xilli ay taagan tahay xiisad siyaasadeed oo la xiriirta doorashooyinka iyo dhammaadka muddo xileedka madaxda.
Cabdi Xaashi ayaa sheegay inuu dib ugu soo laabanayo fagaaraha siyaasadda kaddib muddo uu ka maqnaa, isagoo xusay in maqnaanshihiisa uu la xiriiray xaalad caafimaad, balse hadda wixii ka dambeeya uu si joogto ah uga qayb geli doono doodaha siyaasadeed ee dalka.
Guddoomiyaha ayaa si cad u sheegay in dhibaatada ugu weyn ee dalka ay tahay ku dhaqmi la’aanta sharciga, isagoo tilmaamay in mas’uuliyaddaasi ay wada saaran tahay dowladda iyo bulshada. “Dowladdu waa inay sharciga fulisaa, laakiin annaga lafteennu waa dowladdii, haddana sharciga ma raacno, ayuu yiri.
Hadalka Cabdi Xaashi ayaa kusoo aadaya xilli ay sii xoogeysanayaan murannada la xiriira hannaanka doorashooyinka iyo wax ka beddelka dastuurka, kuwaas oo dhaliyay kala aragti duwanaansho siyaasadeed oo baahsan.
Guddoomiyaha Aqalka Sare ayaan muddo ka muuqan fagaaraha siyaasadda tan iyo markii ay cirka isku shareereen xiisadaha horraantii sanadkan, kuwaas oo la xiriiray arrimaha doorashada iyo isbeddellada sharciyeed ee ay wado dowladda federaalka.
Cabdi Xaashi ayaa hore uga mid ahaa siyaasiyiintii si cad uga horyimid muddo kordhintii loo sameeyay Maxamed Cabdullaahi Farmaajo sanadkii 2021, xilli uu jiray khilaaf xooggan oo doorasho.
Soo laabashadiisa ayaa imaaneysa iyadoo dalka uu wajahayo hubanti la’aan siyaasadeed oo cusub, isla markaana weli la isku mari la’yahay hannaanka doorashooyinka iyo jihada dowladnimada mustaqbalka.
Ilo siyaasadeed ayaa sheegaya in mowqifka uu qaato Cabdi Xaashi maalmaha soo socda uu saameyn ku yeelan karo isku dheelitirka awoodaha siyaasadeed ee dalka, maadaama uu yahay shaqsi leh miisaan culus oo ka dhex muuqda siyaasadda Soomaaliya.
