Wararka24: Askari ka tirsan ciidamada Mareykanka ayaa wajahaya dacwad culus kadib markii lagu eedeeyay inuu ka faa’iideystay xog sir ah si uu sharad uga sameeyo howlgal militari oo lagu bartilmaameedsaday hoggaamiyihii Venezuela.
Waaxda Caddaaladda Mareykanka ee Department of Justice ayaa sheegtay in askarigaasi, Gannon Ken Van Dyke, uu ka ganacsaday xog aan dadweynaha loo shaacin isagoo adeegsanaya madal crypto ah oo lagu magacaabo Polymarket.
Van Dyke, oo ka tirsanaa ciidamada ku sugan Fort Bragg, ayaa lagu eedeeyay inuu sharad ku galay qabashada Nicolás Maduro ka hor inta aan howlgalkaasi si rasmi ah loo shaacin.
Sida lagu sheegay eedeymaha, askarigan ayaa ku guuleystay in ka badan $400,000, kadib markii uu maalgeliyay lacag ka badan $33,000 oo ku saabsan natiijada iyo waqtiga howlgalka loo bixiyay “Operation Absolute Resolve.”
Dacwad-oogayaasha ayaa tilmaamay in ficilkaasi uu yahay xadgudub cad oo ka dhan ah sharciyada federaalka, maadaama uu si toos ah u adeegsaday xog sir ah oo la xiriirta amniga qaranka si uu u helo faa’iido dhaqaale.
Mas’uuliyiinta ayaa sidoo kale xusay in askarigu uu hore u saxiixay heshiisyo adag oo mamnuucaya in xogta sirta ah loo adeegsado dano gaar ah, taas oo hadda lagu eedeeyay inuu jebiyay.
Dhanka kale, madasha Polymarket ayaa sheegtay inay iyadu ogaatay dhaqdhaqaaqa shakiga leh isla markaana ay la wadaagtay hay’adaha dowladda si loo baaro arrinta.
Xeer-ilaaliyeyaasha Mareykanka ayaa ku adkeysanaya in suuqyada saadaasha aysan noqon karin meel lagu qariyo isticmaalka xogaha sirta ah, iyadoo kiiskan uu muujinayo khataraha ka dhalan kara isku darka sirdoonka iyo suuqyada khamaarka casriga ah.
Arrintan ayaa kusoo aadeysa xilli ay sii kordhayaan walaacyada ku saabsan isticmaalka macluumaadka qarsoodiga ah ee dowladeed, gaar ahaan marka ay la xiriiraan teknoolojiyada cusub iyo suuqyada crypto
