Wararka24: Dowladda Federaalka Soomaaliya ayaa billowday tallaabooyin hub ka dhigis ah oo lagu beegsanayo qaar kamid ah mas’uuliyiintii taabacsanaa maamulkii hore ee Cabdicasiis Lafta-gareen, si loo xakameeyo xaaladda kacsan ee ka jirta Baydhabo.
Ciidamada dowladda ayaa la sheegay inay si gaar ah u bartilmaameedsadeen mas’uuliyiin ka tirsan Koonfur Galbeed, iyagoo ka uruurinaya hubka iyo ilaalada, tallaabadaas oo lagu sheegay mid lagu sugayo amniga guud ee magaalada.
Wararka ayaa sheegaya in hubka lagala wareegay Maxamed Yuusuf, oo ahaa wasiir ku xigeenkii amniga Koonfur Galbeed, isla markaana laga qaaday ciidankii ilaalada u ahaa, kadib markii lagu tuhmay inuu xiriir la lahaa mas’uuliyiintii hore ee maamulka.
Sidoo kale, duqa Baydhabo Cabdullaahi Watiin ayaa la geliyay xabsi guri, iyadoo laga qaaday ilaaladiisii, kadib tuhunno la xiriira dhaqdhaqaaqyo amni oo ka dhacay magaalada.
Ilo xog-ogaal ah ayaa tilmaamaya in tallaabooyinkan ay qeyb ka yihiin dadaallo ay dowladda ku xasilinayso xaaladda, kaddib markii ciidamo taabacsanaa Lafta-gareen ay horay uga baxeen Baydhabo kuna sii jeesteen gobolka Gedo, iyagoo wata hub iyo gaadiid dagaal.
Xiisaddan ayaa kusoo aadeysa xilli dowladda federaalka ay qorsheyneyso inay ka qabato deegaannada Koonfur Galbeed doorashooyin qof iyo cod ah, taas oo ay diidan yihiin qaar kamid ah dhinacyada siyaasadda iyo ciidamada taageersan maamulkii hore.
Xaaladda guud ee Baydhabo ayaa weli ah mid feejignaan leh, iyadoo ay socdaan dhaq-dhaqaaqyo amni oo joogto ah, islamarkaana la sugayo sida ay wax u sii socdaan maalmaha soo socda.
