Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud ayaa xarigga ka jaray xarunta dhexe ee Wasaaradda Dekadaha iyo Gaadiidka Badda, isagoo ku dhawaaqay in dalka uu si dhab ah ugu jihaysan yahay ka faa’iidaysiga kheyraadka badda.
Madaxweynaha ayaa sheegay in Soomaaliya ay leedahay bad aad u ballaaran oo ka weyn dhulka dalka, balse aan weli si buuxda looga faa’iidaysan, taas oo uu ku tilmaamay fursad dhaqaale oo weyn oo u baahan in si xeel dheer loo maareeyo.
“Waxaan rabnaa in qarnigan 21-aad aan iswaafajino nolosheenna iyo kheyraadka dabiiciga ah ee aan haysanno. Meesha horumarku naga jiro waa badda,” ayuu yiri Madaxweynaha, isaga oo xusay muhiimadda ay leedahay in laga faa’iidaysto khayraadka badda.
Sidoo kale, Madaxweyne Xasan Sheekh ayaa tilmaamay in dowladdu mudnaan gaar ah siinayso sugidda amniga badda, ilaalinta kheyraadka dabiiciga ah iyo ka hortagga xaalufinta, si loo xaqiijiyo in si waara looga faa’iidaysto khayraadkaasi.
Wuxuu carrabka ku adkeeyay in ilaalinta deegaanka badda ay tahay arrin muhiim ah, isla markaana ay socdaan qorshayaal lagu xoojinayo maareynta isticmaalka kheyraadka badda si aan loo dhaawicin deegaanka.
Ugu dambeyn, Madaxweynaha ayaa sheegay in dowladda ay qorsheyneyso in badda laga dhigo laf-dhabarta dhaqaalaha dalka, isagoo xusay in markii ugu horreysay si rasmi ah looga bilaabayo shidaal qodis badda gudaheeda, gaar ahaan ceelka lagu magacaabo Curad-1.
DAAWA
