Wararka24: Ra’iisul Wasaaraha somaaliya Xamza Cabdi Barre ayaa si rasmi ah u dhagax dhigay xarun loogu talagalay horumarinta manaahijta waxbarashada dalka. Munaasabadda ayaa lagu qabtay Muqdisho iyadoo ay ka qeyb galeen mas’uuliyiin ka tirsan dowladda.
Ra’iisul Wasaaraha ayaa sheegay in horumarinta waxbarashadu ay tahay tiirka ugu muhiimsan ee lagu gaari karo mustaqbal wanaagsan. Wuxuu xusay in xukuumadda Dan-Qaran ay mudnaan gaar ah siinayso casriyeynta iyo tayeynta nidaamka waxbarashada.
Xamza Cabdi Barre ayaa tilmaamay in manhaj tayo leh uu saldhig u yahay waxbarashada dalka. Wuxuu sheegay in xaruntan cusub ay door weyn ka qaadan doonto kor u qaadidda aqoonta jiilasha soo koraya.
Mashruucan ayaa qeyb ka ah dadaallada dowladda ee lagu xoojinayo adeegyada bulshada, gaar ahaan waxbarashada. Waxaa la filayaa in xaruntu ay isku xirto horumarinta manhajka iyo baahiyaha ardayda.
Ra’iisul Wasaaraha ayaa sidoo kale xusay in xaruntani ay gacan ka geysan doonto dhismaha bulsho aqoon leh oo la jaanqaadi karta isbeddellada casriga ah. Wuxuu tilmaamay in waxbarashada ay muhiim u tahay horumarka dalka.
Dhanka kale, Xamza ayaa sheegay in dowladda ay qorsheyneyso dib-u-dhiska xarumaha hay’adaha dowladda. Wuxuu ugu baaqay shacabka inay banneeyaan goobaha dowladda si loo dardar geliyo adeegyada guud.
Tallaabadan ayaa muujinaysa dadaalka dowladda ee lagu horumarinayo waxbarashada iyo dib-u-dhiska hay’adaha muhiimka ah ee dalka.
