Wararka24: Go’aan uu soo saaray Guddoomiyaha Gobolka Banaadir Xasan Maxamed Xuseen Muungaab ayaa si rasmi ah uga dhaqan-galay magaalada Muqdisho, kaas oo lagu amray in si buuxda loo qaato lacagta shilin Soomaaliga.
Amarkan ayaa yimid kadib markii ganacsatada qaarkood ay diideen kunka shilin, taas oo jahawareer ku keentay ganacsiga iyo adeegyada bulshada ee caasimadda.
Maamulka ayaa si cad u sheegay in ganacsade kasta oo diida lacagta dalka loo aqoonsan doono mid jebiyay amar dowladeed, iyadoo la adkeeyay muhiimadda ay leedahay ilaalinta lacagta maxalliga ah.
Maanta ayaa si muuqata dib loogu bilaabay isticmaalka shilinka suuqyada, iyadoo ganacsato badan ay sheegeen inay u hoggaansameen amarka, si ay u sii wadaan ganacsigooda.
Qaar ka mid ah ganacsatada Suuq Bacaad ayaa sheegay in dib u soo celinta lacagta ay ka caawisay fududeynta macaamilka, maadaama lacagta kale iyo mobile-ka aysan mar walba daboolin baahida suuqa.
Go’aankan ayaa qayb ka ah dadaallada Maamulka Gobolka Banaadir uu ku doonayo xoojinta nidaamka dhaqaale iyo kalsoonida lacagta dalka.
