Wararka24: Xukuumadda Somaliland ayaa si adag uga jawaabtay war-saxaafadeed ay soo saartay Dowladda Federaalka Soomaaliya, kaas oo lagu diiday magacaabista safiir ay Israa’iil u dirtay Somaliland.
Warsaxaafadeed ka soo baxay Wasaaradda Arrimaha Dibadda Somaliland ayaa lagu sheegay in eedeymaha Muqdisho ay yihiin kuwo aan sal sharci lahayn, isla markaana ka fog xaqiiqada taariikhiga ah iyo tan siyaasadeed ee Somaliland.
Somaliland ayaa ku adkaysatay mowqifkeeda ah inay tahay dal madax-bannaan oo xornimadiisa qaatay 26-kii June 1960, islamarkaana aanay madax-bannaanideedu ku xirnayn ama ka imanayn Muqdisho.
Sidoo kale, waxay sheegtay in Dowladda Federaalka Soomaaliya aysan sharci u lahayn inay ka hadasho ama farageliso xiriirrada diblomaasiyadeed ee ay la leedahay dalalka kale, iyadoo arrintaas ku tilmaantay mid ka mid ah xuquuqaha dowladnimo ee ay leedahay Somaliland.
Xukuumadda Somaliland ayaa sidoo kale dood ka keentay arrinta midnimada Soomaaliya, iyadoo sheegtay in midowgii 1960 aanu lahayn sal sharci oo adag, isla markaana ay dib ula soo noqotay madax-bannaanideeda sanadkii 1991.
Dhanka kale, Somaliland waxay xustay inay dhistay hay’ado dimuqraadi ah, qabatay doorashooyin kala duwan, isla markaana ay ilaalisay amniga gudaha, iyada oo door ka qaadatay la dagaallanka argagixisada iyo sugidda marin-biyoodka gobolka.
Gabagabadii, Somaliland ayaa caddeysay inay diyaar u tahay wada noolaansho nabadeed iyo iskaashi caalami ah, balse ay madax-bannaanideedu tahay mid aan gorgortan geli karin, isla markaana ay si madax-bannaan u maamulan doonto xiriirradeeda dibadda.
