Wararka24: Ra’iisul wasaarihii hore ee Soomaaliya Cumar Cabdirashiid Cali Sharmaarke ayaa shaaciyay in dalka uu galay marxalad xasaasi ah kadib dhammaadka muddo xileedka Baarlamaanka Federaalka Soomaaliya oo ku ekaa 14-ka April 2026.
Qoraal uu soo saaray, ayuu ku sheegay in Soomaaliya ay wajahday firaaq dastuuri ah iyo hubanti la’aan siyaasadeed, taas oo keeni karta jahwareer ku yimaada hay’adaha dowliga ah iyo geedi-socodka dimuqraadiyadeed.
Cumar Cabdirashiid ayaa tilmaamay in Dowladda Federaalka ay hadda ku shaqeyneyso xaalad uu ku sifeeyay “waqti amaah ah,” isla markaana ay haysato fursado aad u kooban oo u baahan in si degdeg ah looga faa’iideysto.
Wuxuu xusay in Madaxweynaha Soomaaliya Xasan Sheekh Maxamuud uu haysto fursad hal bil ah oo uu ku abuuri karo jawi wada-hadal oo loo dhan yahay, si loo gaaro heshiis ku saabsan hannaanka doorashooyinka dalka.
“Waxaa weli jira hal bil oo uu Madaxweynaha ku kulmin karo dhammaan dhinacyada ay khusayso arrinta doorashada si loo gaaro heshiis la wada oggol yahay,” ayuu yiri Ra’iisul wasaarihii hore, isagoo carrabka ku adkeeyay muhiimadda wada-tashiga.
Sidoo kale, wuxuu ka digay in awoodda lagu koobto hal dhinac xilli ay dhammaanayso muddo xileedka, taas oo uu sheegay inay tahay caqabad soo noqnoqotay oo u baahan xal waara.
Hadalkan ayaa kusoo aadaya xilli ay sii kordhayaan dhaqdhaqaaqyada mucaaradka iyo dowlad-goboleedyada sida Puntland iyo Jubaland, kuwaas oo dalbanaya in xal siyaasadeed degdeg ah laga gaaro xaaladda dalka.
Si kastaba, Soomaaliya ayaa wajahaysa marxalad kala guur ah oo u baahan hoggaan siyaasadeed oo mideeya dhinacyada kala duwan si looga fogaado qalalaase siyaasadeed oo hor leh.
