Wararka24: Faah-faahinno dheeraad ah ayaa kasoo baxaya shaqaaqo ka dhacday degmada Xamarweyne ee magaalada Muqdisho, taas oo u dhexeysay ciidamo ka tirsan Booliska iyo ilaalada Wasiirka Amniga Gudaha Cabdullahi Sheekh Ismaaciil Fartaag.
Shaqaaqadan ayaa bilaabatay markii ciidamo Boolis ah oo ku sugnaa koontaroolka ay joojiyeen gaari uu watay darawalka wasiirka, xilli uusan wasiirku la socon. Wararka ayaa sheegaya in is-faham la’aan degdeg ah ay ka dhalatay habka loo maareeyay baaritaanka, taas oo keentay xiisad u dhexeysa labada dhinac.
Ilo amni ayaa sheegay in darawalka uu bistoolad la soo baxay, halka ciidamada Booliska ay iyaguna hubkooda diyaarsadeen, taas oo sababtay in xaaladdu faraha ka baxdo, isla markaana gaariga iyo darawalka lagu hakiyo goobta.
Markii dambe, taliyaha ilaalada wasiirka ayaa ciidamo gurmad ah la gaaray goobta, waxaana sidoo kale ku biiray sarkaal ka tirsanaa ilaalada Madaxtooyada Qaranka. Halkaas ayaa mar kale iska hor imaad culus ka dhacay, iyadoo rasaas la isku adeegsaday.
Intii ay socotay shaqaaqadu, sarkaal ka tirsanaa ilaalada Madaxtooyada ayaa la dhaawacay kadib markii la sheegay in uu ku dhacay xabbad ka timid taliyaha koontaroolka, wuxuuna markii dambe u geeriyooday dhaawaca soo gaaray.
Ciidamada ilaalada wasiirka ayaa qabtay taliyaha lagu eedeeyay falkaas, waxaana loo gudbiyay saldhigga Booliska Xamarweyne, halkaas oo uu hadda ku xiran yahay, iyadoo baaritaanno lagu wado.
Dhanka kale, saraakiil ka tirsan laamaha amniga ayaa goobta soo gaaray, kuwaas oo dib u dejiyay xaaladda, isla markaana qaaday gaariga iyo darawalkii la socday.
Ilaa hadda, ma jirto wax war rasmi ah oo kasoo baxay hay’adaha amniga ee ku aaddan dhacdadan, iyadoo la sugayo natiijada baaritaanka si loo caddeeyo sida saxda ah ee ay wax u dhaceen.
