Wararka24: Wasiirka Warfaafinta, Dhaqanka iyo Dalxiiska Soomaaliya Daa’uud Aweys Jaamac ayaa xafiiskiisa ku qaabilay sii hayaha wakiilka Qaramada Midoobay u qaabilsan Soomaaliya Raisedon Zenenga. Kulankan ayaa diiradda lagu saaray arrimo dhowr ah oo quseeya xaaladda dalka.
Labada dhinac ayaa ka wada hadlay horumarka ay Soomaaliya ka sameyneyso dhinacyada amniga, siyaasadda, dib u heshiisiinta iyo dhaqaalaha. Sidoo kale waxaa la isla soo qaaday horumarinta adeegyada bulshada iyo dadaallada dowlad dhiska.
Wasiirka Warfaafinta ayaa uga mahadceliyay Qaramada Midoobay taageerada ay siiso Soomaaliya, isagoo tilmaamay inay door muuqda ka qaadato dib u dhiska iyo soo kabashada dalka. Wuxuu xusay muhiimadda iskaashiga caalamiga ah ee lagu taageerayo horumarka.
Dhankiisa, Raisedon Zenenga ayaa bogaadiyay tallaabooyinka ay qaadayso Dowladda Federaalka Soomaaliya. Wuxuu sheegay in Qaramada Midoobay ay ka go’an tahay sii wadista taageerada ay siiso howlaha horumarineed ee dalka.
Kulankan ayaa qeyb ka ah xiriirka joogtada ah ee u dhexeeya Soomaaliya iyo Qaramada Midoobay, kaas oo diiradda saaraya xoojinta nabadda iyo horumarka. Labada dhinac ayaa muujiyay muhiimadda wada shaqeynta joogtada ah.
Dowladda Soomaaliya iyo Qaramada Midoobay ayaa sii wada iskaashiga dhinacyada kala duwan, si loo gaaro xasillooni iyo horumar waara oo dalka ka hanaqaada.
