Wararka24: Ciidanka Xoogga Dalka Soomaaliya iyo ciidamada amniga Jubbaland ayaa howlgal ballaaran ka wada deegaanno ka tirsan gobollada Jubbada Hoose iyo Jubbada Dhexe. Howlgalladan ayaa lagu beegsanayaa kooxaha hubeysan ee ku sugan deegaannadaas.
Howlgalka ayaa si gaar ah uga socda deegaanno hoostaga degmooyinka Jilib, Xagar iyo Afmadow, iyadoo ciidamadu gaareen goobo ay ka mid yihiin Waraha Qalley, Farshabeel, Jigees, Qaawiley iyo Weelmaarow. Tallaabadan ayaa qeyb ka ah dadaallada lagu xoojinayo amniga Jubbooyinka.
Intii ay socdeen howlgaladan dhulka ah, waxaa barbar socday duqeymo cirka ah oo ay taageerayeen saaxiibbada caalamka. Duqeymahan ayaa sare u qaaday awoodda ciidamada ee beegsiga maleeshiyaadka ku dhuumaaleysanaya deegaannada hawlgalku ka socdo.
Wararka ayaa sheegaya in howlgalka lagu gaarsiiyay kooxahaasi jab xooggan, iyadoo la dilay tiro ka mid ah dagaalyahannada, oo ay ku jiraan xubno muhiim ah. Sidoo kale, ciidamada ayaa gacanta ku dhigay hub iyo saanad ciidan oo kala duwan.
Hubka la qabtay waxaa ka mid ah qoryaha culus iyo kuwa fudud, iyo walxo qaraxyo ah oo la sheegay in lagu dhibaateyn lahaa shacabka. Tani ayaa loo arkaa guul muhiim ah oo dhanka amniga ah.
Ciidamada dowladda iyo kuwa Jubbaland ayaa sheegay inay sii wadi doonaan howlgalada lagu baacsanayo haraadiga kooxaha hubeysan, si loo xaqiijiyo amniga iyo xasilloonida deegaannada Jubbooyinka.
