Wararka24: Golaha Wasiirrada Soomaaliya ayaa maanta ansixiyay xil ka qaadista Agaasimihii Guud ee Hay’adda Socdaalka iyo Jinsiyadda Mustaf Sheekh Cali Dhuxulow, iyagoo sidoo kale magacaabay agaasime cusub oo hoggaamin doona hay’adda. Go’aankan ayaa lagu gaaray fadhi rasmi ah oo ay yeesheen Golaha Wasiirrada.
Golaha ayaa u magacaabay xilka Agaasimaha Guud Xuseen Qaasim Yuusuf, kaddib soo jeedin ka timid Wasaaradda Amniga Gudaha. Mas’uulkan cusub ayaa horey u soo qabtay xilal kala duwan oo heer dowladeed ah, taas oo lagu sheegay inay khibrad u siinayso xilka cusub.
Xuseen Qaasim Yuusuf ayaa horay u ahaa Wasiirkii Madaxtooyada Galmudug iyo xildhibaan ka tirsan Golaha Shacabka, sidoo kale wuxuu soo noqday guddoomiyaha guddiga la socodka dib u eegista dastuurka. Dowladda ayaa ku tilmaantay magacaabistiisa mid lagu xoojinayo howlaha hay’adda.
Agaasimihii hore, Mustaf Sheekh Cali Dhuxulow, ayaa xilka hayay tan iyo dhammaadkii sanadkii 2024, markii si rasmi ah loogu magacaabay hoggaanka hay’adda socdaalka. Lama shaacin sabab rasmi ah oo keentay xil ka qaadistiisa.
Isbeddelkan ayaa qayb ka ah dib u habeyn lagu sameynayo hay’adaha la xiriira amniga iyo adeegyada socdaalka. Dowladda ayaa sheegtay in tallaabooyinkan ay muhiim u yihiin horumarinta adeegyada iyo maamulka hay’adaha.
Go’aanka Golaha Wasiirrada ayaa kusoo aadaya xilli ay jiraan dadaallo lagu hagaajinayo nidaamka socdaalka iyo jinsiyadda, iyadoo la doonayo in la kordhiyo hufnaanta iyo tayada adeegyada la siiyo muwaadiniinta.
