Wararka24: Qaar ka mid ah ganacsatada ku sugan Muqdisho ayaa maanta joojiyay qaadashada lacagta shilin Soomaaliga, gaar ahaan kunka shilin, taas oo saameyn ku yeelatay shacabka ku tiirsan lacagtaas. Arrintan ayaa laga dareemay suuqyo kala duwan oo ka tirsan caasimadda.
Wararka ayaa sheegaya in lacagta kunka shilin laga diiday meelo ay ka mid tahay degmada Heliwaa, halkaas oo ganacsatada ay u wareegeen isticmaalka doolarka Mareykanka iyo lacagaha elektarooniga ah ee taleefannada. Tani ayaa keentay jahawareer ku yimid dadka adeegsan jiray lacagta kaashka ah.
Dadka deegaanka ayaa sheegay in sababta ugu weyn ay tahay duugowga iyo jeex jeexa ku yimid lacagta, maadaama muddo dheer aan dib loo soo cusbooneysiin. Qaar badan oo ka mid ah lacagaha ayaa noqday kuwo aan la aqbali karin marka la eego xaaladdooda.
Saameynta arrintan ayaa sidoo kale gaartay gaadiidka dadweynaha, iyadoo darawallada qaarkood ay diideen in lagu bixiyo lacagta shilinka Soomaaliga. Tani waxay adkeyn ku keentay isku socodka dadka iyo adeegyada maalinlaha ah.
Ganacsatada qaar ayaa tilmaamay in ay ku qasbanaadeen go’aankan si ay uga fogaadaan khasaaro ka dhasha lacagaha duugoobay. Si kastaba, dadweynaha ayaa ka cabanaya in aysan si fudud u heli karin beddelka lacagtaas.
Arrintan ayaa kusoo aadeysa xilli horey lacagta kunka shilin looga joojiyay isticmaalka gobollo kale, iyadoo dadku u badan yihiin isticmaalka doolarka iyo lacagaha taleefannada. Dowladda weli kama aysan hadlin tallaabo rasmi ah oo lagu xallinayo xaaladdan.
DAAWA
