Wararka24: Hoggaamiyaha ku meel gaarka ah ee Dowlad Goboleedka Koonfur Galbeed Soomaaliya Jibriil Cabdirashiid Xaaji Cabdi ayaa Aqalka Madaxtooyada ku qabtay shir amni oo uu isugu yeeray saraakiisha ka howlgasha deegaannada maamulkaasi. Shirkan ayaa diiradda lagu saaray xoojinta amniga iyo dardargelinta howlgalada ka dhanka ah kooxaha nabad diidka.
Kulanka waxaa ka qeyb galay Agaasimaha NISA Mahad Maxamed Salaad, Taliyaha Ciidanka Booliska Soomaaliyeed Asad Cismaan Cabdullaahi iyo masuuliyiin kale oo heer federaal iyo heer dowlad goboleed ah. Waxaa sidoo kale goobjoog ka ahaa masuuliyiinta amniga ee maamulka iyo saraakiisha ciidamada.
Hoggaamiyaha ayaa faray saraakiisha in ay dib u xoojiyaan howlgalada amni ee ka socda deegaannada Koonfur Galbeed, si loo xaqiijiyo nabad iyo xasillooni waarta. Wuxuu xusay in loo baahan yahay wada shaqeyn buuxda oo dhexmarta ciidamada kala duwan.
Mas’uuliyiinta kulanka ka qeyb galay ayaa isla gartay in si degdeg ah looga jawaabo xaaladaha amni ee jira, iyadoo la kordhinayo howlgallada lagu beegsanayo kooxaha khawaarijta. Waxay sidoo kale isku raaceen muhiimadda ay leedahay in la xoojiyo xiriirka u dhexeeya shacabka iyo laamaha amniga.
Jibriil Cabdirashiid ayaa bogaadiyay ciidamada dowladda iyo kuwa deegaanka, isagoo ku ammaanay guulaha ay ka gaareen la dagaallanka kooxaha nabad diidka. Wuxuu sheegay in dadaalladaas ay muhiim u yihiin badbaadinta shacabka iyo xasilinta guud ee maamulka.
Shirkan ayaa qeyb ka ah qorshayaasha lagu xoojinayo amniga Koonfur Galbeed, iyadoo la doonayo in la dardargeliyo howlgalada iyo in la helo jawi nabadeed oo waara.
