Wararka24: Marwada Koowaad ee Mareykanka, Melania Trump, ayaa si cad u beenisay warar la xiriirinayay maalqabeenkii geeriyooday Jeffrey Epstein, iyadoo sheegtay inaysan wax xiriir ah la lahayn isla markaana aysan wax ka ogeyn dambiyadii loo haystay. Hadalkan ayay ka jeedisay bayaan ay si naadir ah uga akhrisay Aqalka Cad.
Melania ayaa ku tilmaantay eedeymaha lagu xusay magaceeda kuwo been abuur ah oo aan sal lahayn, isla markaana ah isku day lagu dhaawacayo sumcadeeda. Waxay sheegtay in iyada iyo qareenadeedu ay si buuxda uga hortagayaan faafinta macluumaad aan la xaqiijin.
Waxay sidoo kale si toos ah u sheegtay inaysan saaxiib dhow la ahayn Epstein ama Ghislaine Maxwell, balse ay mararka qaar ku kulmi jireen goobaha bulshada ee New York iyo Florida. Waxay tilmaantay in xiriir kasta oo dhacay uu ahaa mid caadi ah oo aan wax muhiimad gaar ah lahayn.
Hadalkan ayaa yimid xilli ay dib u soo cusboonaadeen doodaha ku saabsan kiiska Epstein, kaddib markii hay’adaha federaalka ay sii daayeen qaybo ka mid ah dokumiintiyo hore.
Qaar ka mid ah xogta la helay ayaa muujisay xiriirro bulsho oo u dhexeeyay dad caan ah iyo Epstein, inkastoo aan caddeyn toos ah la helin.
Melania Trump ayaa sidoo kale ugu baaqday Koongareeska Mareykanka inuu qabto dhegeysi dadweyne oo diiradda lagu saarayo dhibbanayaasha kiiska, si ay fursad ugu helaan inay sheekooyinkooda si toos ah ugu gudbiyaan sharci-dejiyeyaasha. Waxay sheegtay in tani ay muhiim u tahay helitaanka xaqiiqda dhabta ah.
Dhanka kale, xubno ka tirsan Xisbiga Dimoqraadiga ayaa soo dhaweeyay baaqaasi, iyagoo ku adkeeyay in baaritaan dheeraad ah loo baahan yahay. Ilaa hadda ma jirto sabab rasmi ah oo lagu ogaaday sababta ay Melania waqtigan uga hadashay arrintan.
