Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud ayaa magaalada Baydhabo ku guddoomiyay shir ay yeesheen Golaha Wasiirrada Koonfur Galbeed iyo Taliyeyaasha Ciidamada Qalabka Sida.
Shirka waxaa sidoo kale ka qeyb galay Hoggaamiyaha ku meel gaarka ah ee Koonfur Galbeed Jibriil Cabdirashiid Xaaji Cabdi.
Kulanka ayaa diiradda lagu saaray xaaladda guud ee deegaannada Koonfur Galbeed, gaar ahaan sugidda amniga, la dagaallanka argagixisada iyo dardargelinta howlaha xasillinta.
Waxaa sidoo kale looga hadlay gurmadka abaaraha iyo isku dubbaridka dadaallada dowladda ee lagu xaqiijinayo nabad iyo horumar waara.
Madaxweynaha ayaa warbixinno ka dhageystay wasiirrada iyo saraakiisha amniga, isaga oo adkeeyay muhiimadda mideynta awoodda dowladda federaalka iyo maamulka Koonfur Galbeed.
Wuxuu xusay in wada-shaqeyn buuxda ay muhiim u tahay dardargelinta adeegyada bulshada, dib u dhiska hay’adaha iyo horumarinta kaabeyaasha dhaqaalaha.
