Wararka24: Faah faahinno dheeraad ah ayaa kasoo baxaya howlgal ay ciidamada Booliska ka fuliyeen degmada Xudur ee gobolka Bakool, kaas oo lagu fashiliyay qarax ay maleegeen Al Shabaab.
Ciidamada ayaa ka hortegay miino la doonayay in lagu waxyeeleeyo shacabka, kadib markii ay heleen macluumaad la xiriira qorshaha weerarka.
Qoraal kasoo baxay Taliska Booliska Xudur ayaa lagu sheegay in walxaha qarxa si badbaado leh loo qabtay, isla markaana la bilaabay baaritaanno dheeraad ah.
“Booliska degmada Xudur ayaa gacanta ku dhigay walxo qarxa oo ay Khawaarijtu u maleegeen shacabka,” ayaa lagu yiri warsaxaafadeedka.
Taliyaha saldhigga Booliiska Xudur Aadan Wardheere ayaa shacabka uga mahadceliyay wada shaqeynta ay la leeyihiin ciidamada ammaanka.
Wuxuu sidoo kale sheegay in ay sii wadi doonaan howlgalada lagu xaqiijinayo amniga si looga hortego weerarrada noocaan ah.
