Wararka24: Ra’iisul Wasaarihii hore ee Soomaaliya, Cumar Cabdirashiid Cali Sharmaarke, ayaa ka hadlay xaaladda siyaasadeed ee ka taagan Koonfur Galbeed, isagoo muujiyay walaac ku saabsan awoodda maamulkaas.
Sharmaarke ayaa sheegay in awooddii dowlad-goboleedka Koonfur Galbeed loo rogay mid hoose oo si toos ah uga amar qaata Dowladda Federaalka Soomaaliya.
Wuxuu xusay in aanay jirin sharci ogolaanaya in dowlad-goboleed lagu beddelo maamul ku meel gaar ah oo ka amar qaata dowladda dhexe, isagoo carrabka ku adkeeyay muhiimadda nidaamka federaalka.
“Doorasho waa la qaban karaa iyadoo uu jiro maamul ku meel gaar ah oo heer dowlad-goboleed ah, balse su’aashu waa haddii la beddelayo jihada nidaamka federaalka,” ayuu yiri Sharmaarke.
Sidoo kale, wuxuu ka digay in tallaabo kasta oo ka hor imaanaysa dastuurka ay dib u celin karto horumarka siyaasadeed, isla markaana ay dhalin karto qalalaase cusub.
Hadalka Sharmaarke ayaa imanaya xilli dood xooggan ay ka taagan tahay magacaabista hoggaamiye KMG ah oo loo sameeyay Koonfur Galbeed.
Ra’iisul Wasaare Xamza Cabdi Barre ayaa horey u magacaabay Jibriil Cabdirashiid Xaaji inuu noqdo hoggaamiyaha KMG ah, kadib isbeddello ka dhacay Baydhabo.
