Maareeyaha guud ee Hay’adda Aqoonsiga iyo Diiwaangelinta Qaranka NIRA Cabdiweli Cali Cabdulle Timacadde iyo safiirka Soomaaliya ee Kenya Jabriil Ibraahim Cabdulle ayaa maanta si wadajir ah xarigga uga jaray xafiiska diiwaangelinta iyo kaar bixinta NIRA ee safaaradda Soomaaliya ee Nairobi.
Maareeyaha NIRA ayaa sheegay in adeegyada hay’adda si tartiib ah loogu fidinayo gudaha dalka iyo dibaddiisa, si muwaadiniinta Soomaaliyeed loo gaarsiiyo kaarka aqoonsiga qaranka.
Wuxuu xusay in safaaradda Kenya ay noqotay xarunta 30aad ee laga hirgeliyo adeegyada NIRA, taas oo qayb ka ah qorshaha ballaarinta adeegyada diiwaangelinta.
Safiirka Soomaaliya ee Kenya ayaa dhankiisa sheegay in bulshada Soomaaliyeed ee ku dhaqan dalka Kenya ay hadda si fudud uga heli karaan kaarka aqoonsiga qaranka gudaha safaaradda.
Masuuliyiinta ayaa tilmaamay in tallaabadan ay fududeynayso helitaanka adeegyada dowliga ah iyo aqoonsiga muwaadiniinta Soomaaliyeed ee ku nool dibadda.
