Wararka24: Dowladda Turkiga ayaa kordhisay dadaallada diblomaasiyadeed ee lagu doonayo in lagu soo afjaro dagaalka u dhexeeya Iiraan iyo xulafada Mareykanka iyo Israa’iil, iyadoo wada hadallo la leh dhinacyo kala duwan.
Wasiirka arrimaha dibadda Turkiga Hakan Fidan ayaa xiriirro isdaba joog ah la sameeyay dhiggiisa dalalka Iiraan, Masar iyo qaar ka mid ah dalalka Yurub, si loo qiimeeyo fursadaha xabbad joojin.
Sidoo kale, Ankara ayaa la hadashay saraakiil Mareykan ah iyo dowlado kale oo gobolka ah, iyadoo diiradda la saarayo sidii loo heli lahaa xal siyaasadeed oo lagu dejin karo colaadda.
Xogaha laga helayo Turkiga ayaa muujinaya in dowladdaasi ay riixeyso xabbad joojin ku meel gaar ah oo fursad siin karta wada hadallo rasmi ah.
Dadaalladan ayaa kusoo aadaya xilli madaxweynaha Mareykanka Donald Trump uu sheegay in ay socdaan wada hadallo wax ku ool ah, isla markaana uu dib u dhigay qorshayaal militari oo ka dhan ah Iiraan.
Si kastaba, Turkiga ayaa ka digay caqabado ka iman kara dhinacyada dagaalka, gaar ahaan suurtagalnimada in colaadda la sii dheereeyo.
Dalalka gobolka iyo kuwa caalamiga ah ayaa si dhow ula socda xaaladda, iyadoo weli aan la hubin in la gaari karo heshiis waara oo lagu soo afjaro dagaalka.
