Wararka24: 7-02-2026 Ra’iisul Wasaaraha Xukuumadda Federaalka Soomaaliya Xamsa Cabdi Barre ayaa maanta xarigga ka jaray Xarunta Qaran ee Amniga Saaybarka (SOMCIRT), oo loogu talagalay ka jawaabista xaaladaha degdegga ah ee la xiriira amniga isgaarsiinta iyo weerarrada dhanka saaybarka.
Ra’iisul Wasaaraha ayaa sheegay in xaruntan ay muhiim u tahay amniga qaranka, maadaama dunida ay si weyn ugu jihaysan tahay tiknoolojiyadda, isla markaana ay sii kordhayaan khataraha amniga ee ka dhaca dhanka internetka iyo isgaarsiinta.
Xarunta SOMCIRT ayaa la filayaa inay door weyn ka qaadato ka hortagga weerarrada saaybarka, ilaalinta macluumaadka hay’adaha dowladda iyo la socodka khataraha ku wajahan nidaamyada tiknoolojiyadda ee dalka.
Mudane Xamsa Cabdi Barre ayaa sidoo kale tilmaamay in xaruntani ay mas’uul ka noqon doonto isku-duwidda iyo ka jawaabidda dhacdooyinka amniga saaybarka, iyo diiwaangelinta weerarrada ka dhanka ah tiknoolojiyadda.
Ra’iisul Wasaaraha ayaa sheegay in shacabka Soomaaliyeed laga wacyigelin doono khataraha ka iman kara dhanka isgaarsiinta iyo sida looga hortagi karo.
Daahfurka xaruntan ayaa yimid kadib soo jeedin ay sameysay Wasaaradda Boostada iyo Isgaarsiinta ee Dowladda Federaalka Soomaaliya, iyadoo Hay’adda Isgaarsiinta Qaranka (NCA) ay door ka qaadatay horumarinta kaabeyaasha dijitaalka iyo amniga tiknoolojiyadda ee dalka.
