Wararka24: 7-02-2026 Boqortooyada Sacuudi Carabiya ayaa si rasmi ah u aqoonsatay safiirka cusub ee dowladda Federaalka Soomaaliya u fadhiya dalkaas, Maxamed Amiin Sheekh Cismaan.
Wasiir ku-xigeenka Arrimaha Habmaamuuska ee Sacuudiga, Cabdulmajiid Al-Smari, ayaa guddoomay waraaqaha aqoonsiga ee danjiraha cusub, isagoo wakiil ka ahaa Wasiirka Arrimaha Dibadda ee Boqortooyada.
Wasaaradda Arrimaha Dibadda ee Sacuudiga ayaa ku shaacisay barta X in danjire Maxamed Amiin Sheekh Cismaan uu si rasmi ah u gudbiyay waraaqaha aqoonsiga diblomaasiyadeed ee u oggolaanaya inuu matalo Soomaaliya.
Danjire Maxamed Amiin ayaa xilkan kala wareegaya Aweys Xaaji Yuusuf, oo tan iyo sanadkii 2023 ahaa safiirka Soomaaliya u fadhiya Sacuudiga, balse dhowaan loo magacaabay La-taliyaha Amniga Qaranka ee Madaxweynaha Soomaaliya.
Magacaabista safiirka cusub ayaa timid kadib markii dowladda Sacuudiga ay oggolaatay codsiga ay dowladda Soomaaliya u gudbisay bishii Diseembar ee sanadkii hore.
Danjire Maxamed Amiin Sheekh Cismaan ayaa horay u soo noqday Ku-xigeenka Agaasimaha Madaxtooyada Villa Soomaaliya, waxaana lagu tilmaamaa inuu ka mid yahay mas’uuliyiinta dhow ula shaqeeya Madaxweyne Xasan Sheekh Maxamuud.
Magacaabistan ayaa kusoo aadaysa xilli dowladda Soomaaliya ay dadaal ugu jirto xoojinta xiriirka diblomaasiyadeed iyo iskaashiga ay la leedahay Boqortooyada Sacuudi Carabiya.
