Wararka24: 7-02-2026 markabka Diyaarad-qaadaha Mareykanka ee USS Gerald Ford, oo ah markabka ugu weyn uguna casrisan ee ciidamada badda Mareykanka, ayaa soo gaaray Kanaalka Suweys iyadoo la filayo inuu sii maro marinka Bab el-Mandeb si uu ugu biiro markab kale oo diyaarado qaada oo Mareykanku leeyahay.
Wararka ayaa sheegaya in markabka Ford uu ku biiri doono diyaar-qaadaha USS Abraham Lincoln, kaas oo la sheegay inuu ku sugan yahay dhanka Badda Carabiya, masaafo qiyaastii 1,000 kiiloomitir u jirta dalka Iran.
Dhaqdhaqaaqan militari ayaa imanaya xilli ay sii kordhayaan xiisadaha ka taagan Bariga Dhexe, gaar ahaan khilaafka u dhexeeya Iran, Mareykanka iyo xulafadooda.
Wararka qaar ayaa sheegaya in markabka Ford uu la kulmay dhibaatooyin farsamo oo la xiriira nidaamyadiisa gudaha, inkastoo aan si rasmi ah loo xaqiijin faahfaahinta arrimahaas.
Dhanka kale, kooxda Xuutiyiinta ee Yemen ayaa sheegtay inay la socdaan dhaqdhaqaaqa markabka, iyagoo sheegay inay ku sugi doonaan marinka Bab el-Mandeb.
Sidoo kale, warar kale ayaa tilmaamaya in diyaar-qaadaha USS Abraham Lincoln uu hore ugu dhowaaday Marinka Hormuz balse uu dib uga durkay kadib markii la sheegay in diyaarado daroono iyo gantaallo ay ka yimaadeen dhinaca Iran, inkastoo aan si rasmi ah loo xaqiijin wararka sheegaya in markabkaas waxyeello soo gaartay.
