Wararka24: 6-02-2026 Madaxweynaha Jamhuuriyadda Federaalka Soomaaliya Xasan Sheekh Maxamuud ayaa kulan afur ah ku maamuusay xubnaha Labada Aqal ee Baarlamaanka Federaalka Soomaaliya, isagoo uga mahadceliyay doorkii ay ka qaateen ansixinta iyo dhameystirka dastuurka dalka.
Kulankan oo ka dhacay mid ka mid ah hoteellada magaalada Muqdisho ayaa Madaxweynaha ku ammaanay xildhibaannada dulqaadka, wada-shaqeynta iyo mas’uuliyadda ay muujiyeen intii ay socotay geeddi-socodka dhameystirka dastuurka.
Madaxweyne Xasan Sheekh ayaa sheegay in dastuurka la ansixiyay uu saldhig u noqon doono dhismaha hay’adaha dowliga ah, ilaalinta xuquuqda muwaadiniinta iyo horumarinta nidaam dowladeed oo ku dhisan sharci iyo isla xisaabtan.
Wuxuu sidoo kale bogaadiyay khubaradii Soomaaliyeed iyo guddiyadii farsamo ee ka shaqeeyay dib-u-eegista iyo wax ka beddelka dastuurka, isagoo xusay in la gaaray heshiis qaran oo ku saleysan danaha shacabka Soomaaliyeed.
Ugu dambeyn, Madaxweynaha ayaa ku boorriyay xubnaha Baarlamaanka iyo hay’adaha dowladda inay sii xoojiyaan wada-shaqeynta si loo xaqiijiyo dowladnimo dhameystiran oo ka tarjumaysa rabitaanka shacabka Soomaaliyeed.
