Wararka24: 6-02-2026 Guddoomiyaha Golaha Shacabka ee Baarlamaanka Federaalka Soomaaliya, Aadan Maxamed Nuur (Aadan Madoobe), ayaa sheegay in muddada xil-heynta Baarlamaanka 11-aad ay noqotay shan sano kadib ansixinta dastuurka cusub ee ay meel mariyeen Labada Aqal ee Baarlamaanka.
Baarlamaanka 11-aad ayaa markii hore lagu doortay dastuurkii ku-meel-gaarka ahaa, kaas oo dhigaya in muddada xil-heyntu ay tahay afar sano, laga bilaabo 14-kii Abriil 2022 ilaa 14-ka Abriil 2026.
Si kastaba ha ahaatee, Guddoomiyaha Golaha Shacabka ayaa sheegay in Baarlamaanka hadda jira uu sii shaqeyn doono muddada uu oggol yahay dastuurka cusub ee la ansixiyay, taas oo dhigaysa shan sano.
Tallaabadan ayaa sidoo kale ka dhigan in muddada xil-heynta Madaxweynaha Soomaaliya ay noqoneyso shan sano, sida ku cad dastuurka cusub, taas oo la micno ah in Madaxweyne Xasan Sheekh Maxamuud uu xilka sii hayn doono ilaa bisha May 2027.
Aadan Madoobe ayaa arrintan ka sheegay kulan afur ah oo Madaxweyne Xasan Sheekh Maxamuud u sameeyay xildhibaannada Labada Aqal ee Baarlamaanka. Wuxuu tilmaamay in hay’adaha dastuuriga ah ay sii shaqeyn doonaan muddada uu qeexayo dastuurka cusub ee la ansixiyay.
Guddoomiyuhu wuxuu sidoo kale sheegay in xildhibaannada Baarlamaanka ay galeen fasax kooban kadib shaqooyin badan oo ay qabteen, isla markaana ay dib ugu soo laaban doonaan shaqada marka fasaxaasi dhammaado.
Dhanka kale, siyaasiyiinta mucaaradka iyo qaar ka mid ah maamul goboleedyada ayaa ka hor yimid dhaqangelinta dastuurka cusub, iyagoo sheegay in habraaca ansixintiisa lagu muransan yahay.
