Wararka24: 4-02-2026 Madaxweynaha Mareykanka Donald Trump ayaa khadka taleefanka kula hadlay hoggaamiyeyaasha Kurdiyiinta ee dalka Ciraaq, si ay uga wada hadlaan dagaalka u dhexeeya Mareykanka, Israa’iil iyo Iiraan iyo sida uu xaaladdaasi u sii socon karo.
Warbaahinta Axios ayaa sheegtay, iyadoo soo xiganaysa ilo xog-ogaal ah, in wadahadalladan ay dhaceen maalin kadib markii uu bilowday ololaha duqeymaha culus ee ka dhanka ah Iiraan.
Trump ayaa la hadlay labada hoggaamiye ee ugu waaweyn garabyada Kurdiyiinta Ciraaq, kuwaas oo kala ah Mascuud Barzani iyo Bafel Talabani.
Ilo-wareedyo ayaa sheegay in wadahadalladu ay ahaayeen kuwo xasaasi ah, maadaama Kurdiyiintu ay ku sugan yihiin deegaano istaraatiiji ah oo ku dhow xuduudda Iiraan iyo Ciraaq.
Kurdiyiinta ayaa sidoo kale leh kumanaan dagaalyahan oo ka tirsan ciidamada Peshmerga, kuwaas oo khibrad dagaal u leh dagaalladii ka dhacay Ciraaq iyo Suuriya.
Sida ay sheegeen wararka, wadahadalladan ayaa yimid kadib dadaallo diblomaasiyadeed oo muddo socday, kuwaas oo ay daaha gadaashiisa ka waday xukuumadda Israa’iil.
Ilo ka tirsan maamulka Mareykanka ayaa sheegay in qorshayaasha qaarkood ay ku lug leeyihiin doorka ay Kurdiyiintu ka qaadan karaan xaaladda ka dhalata dagaalka.
Dhanka kale, hoggaamiyaha xisbiga Midowga Waddaniyiinta Kurdistan (PUK), Bafel Talabani, ayaa xaqiijiyay in uu la hadlay Trump, isagoo sheegay in wada hadalku uu diiradda saaray xaaladda dagaalka ee gobolka.
Kurdiyiinta ayaa ah qowmiyad ku kala sugan dalal badan oo gobolka ah sida Ciraaq, Suuriya, Turkiga iyo Iiraan. Gobolka Kurdistan ee waqooyiga Ciraaq ayaa leh maamul is-maamul ah oo la sameeyay kadib duulaankii Mareykanka ee 2003-dii ee lagu riday xukunkii Saddam Hussein.
Si kastaba, khubarada arrimaha gobolka ayaa sheegaya in doorka ay Kurdiyiintu ka qaadan karaan dagaalka hadda socda uu weli u baahan yahay qiimeyn dheeraad ah, maadaama ay jiraan caqabado siyaasadeed iyo diblomaasiyadeed oo la xiriira dalal kale oo gobolka ah, gaar ahaan Turkiga.
