Wararka24: 4-02-2026 Ciidanka Booliska Soomaaliyeed ayaa sheegay inay xabsiga dhigeen Axmed Cabdi Maxamuud Hurre, oo ah la-taliye sare oo ka tirsan madaxtooyada Puntland, iyagoo ku eedeeyay falal lid ku ah amniga dalka.
Qoraal kasoo baxay taliska booliska ayaa lagu sheegay in Hurre la qabtay xilli uu ku sugnaa magaalada Muqdisho, isla markaana hadda uu ku socdo baaritaan la xiriira eedeymaha loo jeediyay. “Ciidanka Booliska Soomaaliyeed oo gudanaya waajibaadkiisa qaran ayaa soo qabtay eedaysane Axmed Cabdi Maxamuud Hurre oo ku howlanaa falal amniga lid ku ah, waxaana ku socota baaris,” ayaa lagu yiri warka booliska oo lagu baahiyay baraha bulshada.
Dhanka kale, maamulka Puntland ayaa si adag uga horyimid tallaabadaas, isagoo ku tilmaamay xarig sharci-darro ah.
Puntland ayaa sheegtay in ciidamada federaalka ay saqdii dhexe weerar ku qaadeen Hotel Airport ee magaalada Muqdisho, halkaas oo ay deganaayeen xildhibaanno iyo senatarro ka tirsan baarlamaanka Soomaaliya.
Bayaanka kasoo baxay Puntland ayaa lagu sheegay in ciidamada ay xoog ku kaxeysteen Hurre, isla markaana dhacdadaas ay ka dhalatay gacan-qaad iyo buuq ka dhacay hotelka. Maamulka Puntland ayaa ka digay in dhacdadan ay sii kordhin karto xiisadda siyaasadeed ee u dhaxaysa dowladda federaalka iyo maamulka Puntland.
Puntland ayaa sidoo kale sheegtay in dowladda federaalka ay qaadi doonto mas’uuliyadda wixii ka dhasha tallaabadan, iyadoo ku baaqday in arrinta si degdeg ah loo xalliyo si looga fogaado xaalad siyaasadeed oo sii xumaata.
