Wararka24: 1-02-2026 Dowladda Federaalka Soomaaliya ayaa markii ugu horreysay si faahfaahsan uga hadashay xaaladda ka taagan Iiraan iyo dagaalka kusii fidaya Bariga Dhexe, iyadoo caddeysay mowqifkeeda rasmiga ah.
Warsaxaafadeed kasoo baxay Wasaaradda Arrimaha Dibadda iyo Iskaashiga Caalamiga ah ayaa lagu beeniyay warqad lagu faafiyay baraha bulshada oo lagu sheegay in Soomaaliya ay taageertay Iiraan.
Bayaan ku qornaa afka Carabiga oo ay wasaaraddu soo saartay ayaa lagu sheegay in qoraalka cinwaankiisu ahaa “Soomaaliya oo dib u xaqiijisay taageeradeeda Jamhuuriyadda Islaamiga ah ee Iran” uu yahay mid been abuur ah, isla markaana aanay wasaaraddu soo saarin.
Dowladda ayaa sheegtay in mowqifkeedu yahay mid ku saleysan ixtiraamka sharciga caalamiga ah iyo ilaalinta xasilloonida gobolka.
Soomaaliya ayaa sidoo kale cambaareysay weerarrada ay Iiraan ku qaaday dalalka Khaliijka, kuwaas oo lagu beegsaday saldhigyo ay leeyihiin ciidamada Mareykanka. Dowladda ayaa weerarradaas ku tilmaantay kuwo sharci-darro ah oo halis gelinaya nabadda iyo ammaanka gobolka.
Xaaladda Bariga Dhexe ayaa weli ah mid kacsan, iyadoo qaraxyo laga soo sheegay dalal ay ka mid yihiin Imaaraadka iyo Sacuudi Carabiya.
Dhanka kale, Iiraan ayaa wajahaysa xaalad siyaasadeed oo cusub kaddib dilkii hoggaamiyihii sare Aayatullaahi Cali Khamenei, taas oo sare u qaadday walaaca ku saabsan mustaqbalka Jamhuuriyadda Islaamiga ah iyo saameynta ay ku yeelan karto xasilloonida gobolka.
