Wararka24: 1-02-2026 Dowladda Iiraan ayaa ku dhawaaqday in Aayatullaahi Alireza Arafi si ku-meel-gaar ah loogu magacaabay hoggaamiyaha sare ee dalka, kaddib dilkii Aayatullaahi Cali Khamenei ee lagu xaqiijiyay weerar ay fuliyeen Mareykanka iyo Israa’iil. Magacaabistan ayaa lagu sheegay mid lagu xasilinayo hoggaanka dalka inta laga soo dooranayo hoggaamiye rasmi ah.
Sida ay werisay wakaaladda wararka ee Tasnim, Arafi ayaa hoggaamin doona gole ku-meel-gaar ah oo ka kooban madaxweynaha iyo madaxda garsoorka, kaas oo maamuli doona arrimaha dalka ilaa Golaha Khubarada uu soo doorto hoggaamiye cusub. Arafi ayaa lagu tilmaamaa wadaad sare oo ka mid ahaa madaxda ugu awoodda badan Iiraan, isla markaana xiriir dhow la lahaa hoggaamiyihii geeriyooday.
Magacaabistan ayaa timid saacado kaddib markii warbaahinta rasmiga ah ee Iiraan ay xaqiijisay geerida Khamenei, taas oo abuurtay firaaq hoggaamineed oo xasaasi ah. Khubarada siyaasadda ayaa sheegaya in marxaladdan ay noqon karto mid go’aamisa jihada mustaqbalka Jamhuuriyadda Islaamiga ah.
Dhanka kale, xiisadda gobolka ayaa weli kacsan, iyadoo Iiraan ay ku hanjabtay jawaab adag oo ka dhan ah Mareykanka iyo Israa’iil. Waxaa jirta cabsi laga qabo in xaaladdu isu beddesho dagaal ballaaran oo saameeya dalal badan oo Bariga Dhexe ah.
