Wararka24: 1-02-2026 Madaxweynaha Soomaaliya, Xasan Sheekh Maxamuud, ayaa sii wada dadaalladiisa ku aaddan hirgelinta doorasho qof iyo cod ah, xilli ay weli taagan tahay xiisad siyaasadeed oo ka dhalatay khilaafka doorashooyinka iyo wax ka beddelka Dastuurka.
Madaxweynaha ayaa xalay kulan la yeeshay qaar ka mid ah madaxda ururrada siyaasadeed ee is-diiwaangeliyay, isaga oo kala hadlay xaaladda siyaasadeed iyo horumarinta nidaamka dimuqraadiyadda.
Kulanka ayaa diiradda lagu saaray sidii loo xoojin lahaa nidaamka doorashooyinka iyo hubinta ka qaybgal siyaasadeed oo ballaaran. Madaxweynaha ayaa ka dhageystay mas’uuliyiinta talooyin ku saabsan hannaanka doorashada, isagoo ku booriyay inay si firfircoon uga qayb qaataan doorashooyinka la qorsheynayo in laga qabto gobollada dalka.
Dhankooda, madaxda ururrada siyaasadda ayaa carrabka ku adkeeyay muhiimadda midnimada, wadatashiga iyo ilaalinta xasilloonida, si loo xaqiijiyo dowladnimo dhammaystiran.
Kulanka waxaa sidoo kale goob joog ka ahaa Ra’iisul Wasaare Ku-xigeenka Saalax Axmed Jaamac, Wasiirka Arrimaha Gudaha Cali Xoosh, Wasiirka Cadaaladda Xasan Macallin iyo Agaasimaha Guud ee Madaxtooyada Cabdixakiim Maxamed Yuusuf.
Tallaabadan ayaa kusoo beegmeysa xilli ay fashilmeen wada-hadallo u dhexeeyay Villa Somalia iyo Golaha Mustaqbalka, iyadoo Jubbaland, Puntland iyo xubno mucaarad ah ay diideen qorshaha doorasho qof iyo cod ah iyo wax ka beddelka Dastuurka.
Xiisadda siyaasadeed ayaa weli taagan, iyadoo la sugayo sida loo wajihi doono waqtiga kala guurka ee soo dhow.
