Wararka24: 1-02-2026 Madaxweynaha Jamhuuriyadda Jabuuti, Ismaaciil Cumar Geelle, ayaa si adag uga hadlay aqoonsigii ay Israa’iil siisay Somaliland, isagoo ku tilmaamay tallaabo wiiqaysa xasilloonida Geeska Afrika.
Wareysi uu siiyay joornaalka Jeune Afrique ayuu ku sheegay in go’aankaas uu sii hurinayo loollan istaraatiijiyadeed oo ka socda gobolka, gaar ahaan Badda Cas iyo Gacanka Cadmeed.
Geelle ayaa ku eedeeyay Israa’iil inay dano amni iyo milateri ka leedahay marinka Badda Cas, isla markaana uusan aqoonsigu ahayn mid ku saleysan nabad iyo iskaashi oo keliya.
Wuxuu sidoo kale dhaliil u jeediyay Imaaraadka Carabta, isagoo ku andacooday in Abu Dhabi ay door ku lahayd dhiirrigelinta aqoonsiga Somaliland.
Madaxweynaha Jabuuti ayaa sheegay in tallaabooyinka noocan ah ay khatar ku yihiin midnimada Soomaaliya iyo mabaadi’da Midowga Afrika ee ilaalinta xuduudaha dalalka.
Wuxuu xusay in arrinta dekedda Berbera ay leedahay muhiimad istaraatiiji ah, isagoo ka digay suurtagalnimada saldhig milateri oo shisheeye laga sameeyo halkaas.
Geelle ayaa sidoo kale sheegay in xiriirka uu la leeyahay Madaxweynaha Somaliland, Cabdiraxmaan Maxamed Cabdullaahi Cirro, uu yahay mid qabow, isla markaana uusan qaabilin. Wuxuu intaas ku daray in duulimaadyadii u dhexeeyay Jabuuti iyo Somaliland la hakiyay, inkastoo xadka dhulka uu furan yahay.
Dowladda Federaalka Soomaaliya ayaa horey u cambaareysay aqoonsiga Israa’iil, iyadoo ku tilmaantay mid ka hor imaanaya madax-bannaanida iyo wadajirka dhuleed ee dalka. Arrintan ayaa weli sii hurinaysa dood diblomaasiyadeed oo ka taagan gobolka.
