Wararka24: 1-02-2026 Warbaahinta rasmiga ah ee dowladda Iiraan ayaa waaberigii hore ee saaka si rasmi ah u xaqiijisay geerida Hoggaamiyihii ugu sarreeyay dalkaas, Aayatulaahi Cali Khamenei, kadib weerar ballaaran oo la sheegay in ay si wadajir ah u fuliyeen Mareykanka iyo Israa’iil.
Geeridan ayaa abuurtay xaalad siyaasadeed oo cusub, iyadoo laga cabsi qabo in ay keento xasillooni-darro hor leh oo ka dhalata gudaha Iiraan iyo guud ahaan gobolka.
Saacado ka hor xaqiijinta Tehran, Madaxweynaha Mareykanka Donald Trump ayaa qoraal uu soo dhigay baraha bulshada ku sheegay in hoggaamiyaha Iiraan la dilay, isaga oo tallaabadaas ku tilmaamay mid wax ka beddeli karta mustaqbalka dalkaas. Wuxuu sidoo kale sheegay in howlgalada milateri ay sii socon doonaan, isagoo ku dooday in ay la xiriiraan curyaaminta barnaamijka nukliyeerka ee Iiraan.
Telefishinka dowladda iyo wakaaladda IRNA ma aysan bixin faahfaahin dheeraad ah oo ku saabsan sida uu weerarku u dhacay, balse waxay xuseen in Khamenei uu ku sugnaa xaruntiisa ku taalla bartamaha Tehran markii duqeyntu bilaabatay. Sawirro dayax-gacmeed ayaa muujinaya burbur ka dhacay dhismaha la sheegay in uu ku sugnaa.
Mas’uuliyiin sarsare oo Iiraan ah ayaa ku hanjabay jawaab adag. Xoghayaha Golaha Amniga Qaranka, Cali Larijani, ayaa sheegay in Mareykanka iyo Israa’iil ay ka shallayn doonaan falkooda.
Ilaa hadda, ma jiro war rasmi ah oo caddeynaya qorshaha ku-meel-gaarka ah ee hoggaanka dalka, iyadoo Golaha Khubarada uu dastuuri ahaan awood u leeyahay inuu doorto hoggaamiye cusub marka xilku bannaanaado.
Geerida Khamenei, oo xilka hayay tan iyo 1989-kii, ayaa la filayaa inay saameyn weyn ku yeelato jihada siyaasadda Iiraan, iyadoo ay jirto cabsi ku saabsan suurtagalnimada aargoosi iyo fiditaanka dagaalka.
