Wararka24: 28-02-2026 Qaraxyo waaweyn ayaa laga maqlay dalalka Imaaraadka Carabta, Qatar iyo Baxreyn, waxyar kadib weerarro lagu qaaday Tehran oo ay fuliyeen Mareykanka iyo Israa’iil. Wararka hordhaca ah ayaa sheegaya in Iiraan ay gantaallo ku weerartay saldhigyo Mareykan ah oo ku yaalla qaar ka mid ah dalalka Khaliijka.
Dad ku sugan Abu Dhabi ayaa u sheegay AFP inay maqleen jugo xooggan, halka dowladda Imaaraadka ay xaqiijisay dhimashada hal qof oo rayid ah iyo burbur hantiyeed. Abu Dhabi waxaa ku yaal xarumo ay ku sugan yihiin shaqaale Mareykan ah. Dowladda Imaaraadka ayaa sidoo kale ku dhawaaqday xiritaanka hawadeeda si ku meel gaar ah, iyadoo tixgelinaysa xaaladda amni ee sii xumaaneysa.
Dooxa, caasimadda Qatar, ayaa iyaduna laga soo wariyay qaraxyo, balse Wasaaradda Difaaca Qatar ayaa sheegtay in dhammaan gantaalladii ku wajahnaa dalkooda la qabtay lana soo riday, iyadoo aan la shaacin wax khasaare ah. Sidoo kale, Manama ee dalka Baxreyn ayaa laga maqlay qaraxyo, iyadoo warar sheegayaan in gantaallo ku dhaceen aagga Juffair oo ay ku yaallaan xarumo Mareykan ah.
Wasaaradda Arrimaha Gudaha Baxreyn ayaa ku boorrisay shacabka inay raacaan tilmaamaha amniga, kadib digniino degdeg ah oo la baahiyay. Ilaa hadda, ma jiro war rasmi ah oo ka soo baxay Iiraan oo faahfaahin ka bixinaya weerarrada la sheegay, balse dhacdooyinkan ayaa sare u qaaday xiisadda gobolka, iyadoo laga cabsi qabo in xaaladdu isu beddesho iska horimaad ballaaran.
