Wararka24: 28-02-2026 Afhayeenka Madaxweynaha Somaliland, Xuseen Aadan Cige (Deyr), ayaa sheegay in aqoonsiga ay Israa’iil siisay Somaliland 26-kii Diseembar 2025 uu yahay tallaabo istiraatiiji ah oo wax ka beddeli karta miisaanka juqraafi-siyaasadeed ee Geeska Afrika.
Qoraal uu ku baahiyay bartiisa X ayuu ku tilmaamay aqoonsiga mid sare u qaadaya maqaamka caalamiga ah ee Somaliland isla markaana furaya bog cusub oo iskaashi.
Afhayeenku wuxuu sheegay in xidhiidhka cusub uu taaban doono dhinacyo ay ka mid yihiin ganacsiga, tiknoolajiyadda, tamarta, biyaha, beeraha iyo amniga. Wuxuu intaas ku daray in iskaashigu ku dhismi doono dan wadaag iyo aragti istiraatiiji ah oo labada dhinac ka dhaxaysa, isaga oo xusay in goobta juqraafiyeed ee Somaliland ay muhiimad gaar ah u leedahay marin-biyoodka gobolka.
Dhinaca kale, Dowladda Federaalka Soomaaliya ayaa si cad uga soo horjeesatay aqoonsigaas, iyadoo ku tilmaantay mid khatar ku ah midnimada dhuleed ee dalka.
Muqdisho ayaa waddo dadaal diblomaasiyadeed oo ay ku dooneyso in Israa’iil dib uga fiirsato go’aankaas, iyadoo dalal badan oo caalami ah ay muujiyeen mowqif taageeraya midnimada Soomaaliya.
Afhayeenka Madaxweynaha Somaliland ayaa sidoo kale sheegay in la magacaabay safiir u fadhiya Israa’iil, isla markaana Israa’iil ay aqbashay, iyadoo la filayo in ay soo magacowdo wakiilkeeda u fadhiya Hargeysa.
Arrintan ayaa sii kordhisay doodda diblomaasiyadeed ee ku saabsan mustaqbalka siyaasadeed ee Somaliland iyo saameynta ay ku yeelan karto gobolka.
